Հայաստանի կառավարությունը սահմանամերձ Չինարի գյուղում պաշտպանական պատի կառուցման համար միջոցներ է հատկացրել: Այդ մասին այսօր՝ սեպտեմբերի 11-ին, կառավարության նիստին հայտարարեց փոխվարչապետ, տարածքային կառավարման նախարար Արմեն Գեւորգյանը: Նրա խոսքով՝ պատը կկառուցվի սահմանի ամենավտանգավոր մասերում եւ գյուղի ներսում տեղաշարժը առավել անվտանգ կդարձնի:
Բացի այդ, կվերանորոգվի գյուղի դպրոցը: Մարզի մեկ այլ գյուղում՝ Այգեձորում, ոռոգիչ ջրանցք կկառուցվի: Ծրագրվում է վերանորոգել Գեղարքունիքի մարզի մի շարք վարչական օբյեկտներ: Այս բոլոր ծրագրերի համար մոտ 147 մլն դրամ (մոտ 360 հազար դոլար) կտրամադրվի:
«Որքանով ես եմ հասկանում, մենք լուծել ենք բոլոր հարցերը, որոնք տվյալ պահին պարտավորվել ենք լուծել սահմանամերձ գյուղերում», - հայտարարեց վարչապետ Հովիկ Աբրահամյանը՝ նկատի ունենալով մարզեր կատարած իր այցելությունների արդյունքներով տրված հանձնարարությունները: «Տվյալ պահին՝ այո», - պատասխանեց Գեւորգյանը:
