Հայկական ծագմամբ աշխարհահռչակ ֆրանսիական շանսոնյե Շառլ Ազնավուրը հույս ունի, որ կկարողանա նպաստել, որպեսզի Թուրքիայի եւ Հայաստանի հարաբերություններում ինչ-որ բան փոխվի: Այս մասին նա հայտարարել է Լոս Անջելեսում նախանշված համերգի առնչությամբ «The Hollywood Reporter» պարբերականին տված հարցազրույցում:
Պատասխանելով դիվանագետի իր դերի մասին հարցին՝ Ազնավուրը, ով Շվեյցարիայում Հայաստանի դեսպանն ու Ժնեւում ՄԱԿ-ի կենտրոնակայանում Հայաստանի ներկայացուցիչն է, պատասխանել է, որ ինքը կարող է ակտիվ մասնակցություն ունենալ դիվանագիտական հարցերում:
«Օրինակ՝ մենք 12 հազար հայի Սիրիայից Հայաստան ենք տեղափոխել: Մենք պետք է նրանց դուրս բերեինք երկրից, քանի որ նրանք կզոհվեին, որովհետեւ քրիստոնյա են: Եվ ոչ միայն քրիստոնյաները, այլեւ եզդիները եւ որոշ քրդեր, ովքեր մահմեդական են, բայց այլ կերպ են ապրում: Դա ամենեւին էլ քաղաքականություն չէ: Դա դիվանագիտություն է»,- հայտարարել է Ազնավուրը:
Նա հավելել է, որ աշխատում է ինքնուրույն, իսկ հետո արդեն պատմել, թե ինչ է արել: «Ես նախագահից չեմ հարցնում, թե ինչ պետք է անեմ: Ես կարծում եմ, որ այդ շատ դժվար կլիներ: Օրինակ՝ ես հանդիպում եմ ունենալու Թուրքիայի դեսպանի հետ, ինչը չափազանց հազվադեպ է լինում: Ես չեմ ցանկանում նախապես ասել, որ գնալու եմ հանդիպման, քանի որ նրանք կասեն՝ «Մի՛ արա այդ» կամ «Մի՛ գնա այնտեղ»: Ես ցանկանում եմ ազատ մարդ լինել»,- ընդգծել է Ազնավուրը:
Շառլ Ազնավուրը հիշեցրել է, որ 2015 թվականին լրանում է Հայոց Ցեղասպանության 100-րդ տարելիցը, սակայն Թուրքիան դեռեւս չի ճանաչել այն: «Այնպես որ՝ եթե ես կարող եմ ինչ-որ կերպ օգնել, կանեմ այդ: Ես հույս ունեմ, որ կկարողանամ նպաստել, որպեսզի երկու երկրների միջեւ ինչ-որ բան տեղի ունենա»,- ասել է նա:
