Ադրբեջանը սեփական ղեկավարության ստի զոհը դարձավ: Հայաստանի պետական տնտեսագիտական համալսարանում ուսանողների եւ պրոֆեսորա-դասախոսական կազմի հետ հանդիպմանը այս մասին հայտարարել է ՀՀ պաշտպանության նախարար Սեյրան Օհանյանը:
Մեկնաբանելով հուլիս-օգոստոսին հայ-ադրբեջանական սահմանին եւ ԼՂ-ի եւ Ադրբեջանի շփման գծում կատարված դեպքերը՝ նախարարը նկատել է, որ Ադրբեջանի ղեկավարությունը վերջին տարիներին անդադար սպառնալիքներ է կրկնում, մշտապես սպառնում է հարցը լուծել ռազմական ճանապարհով:
Նախարարն ընդգծել է, որ շատախոսությունը բնավ էլ որակ չի նշանակում: «Ադրբեջանական կողմի ձեռնարկած դիվերսիոն փորձերի ընթացքում նրանք հայկական կողմից 9 անգամ ավելի մեծ կորուստ ունեցան: Ես սգում եմ հայ զինվորների մահը: Եվ նաեւ ցավում եմ ադրբեջանցի զինվորների մահվան համար. նրանց մահը Ադրբեջանի ռազմաքաղաքական ղեկավարության խղճի վրա է»,- հայտարարել է նախարարը:
Ըստ նրա՝ զուտ քանակական տվյալները համեմատելու դեպքում կտեսնենք, որ հակառակորդն ավելի շատ տեխնիկա եւ կենդանի ուժ ունի. «Բայց արդեն 20 տարի է, առանց երրորդ ինչ-որ ուժի մասնակցության, ուժերի հավասարակշռության եւ զինվորների որակի գերազանցությամբ պահպանում ենք ստատուս քվոն:
90-ականներին եւս Ադրբեջանը թվային գերազանցություն ուներ: Բայց այն ժամանակ էլ, հիմա էլ հայկական զինված ուժերի որակը գերազանցում է հակառակորդի բանակի որակին»: