Հայաստանի եւ Վրաստանի տարբեր ինտեգրացիոն ուղղությունները չեն ազդի երկկողմ հարաբերությունների վրա: Այդ մասին այսօր՝ սեպտեմբերի 12-ին, մամուլի ասուլիսի ժամանակ հայտարարեց «Արեւմտահայոց հարցերի ուսումնասիրությունների կենտրոնի» ղեկավար Հայկազուն Ալվրցյանը՝ անդրադառնալով ԵՏՄ-ին հանրապետության ինտեգրման գործընթացին: Նրա խոսքով՝ Վրաստանի արեւմտյան հովանավոր ԱՄՆ-ն եւ Հայաստանի խնամակալ Ռուսաստանը, շատ լավ հասկանալով իրավիճակի նրբությունը, կխուսափեն տարածաշրջանում հավասարակշռությունը խախտելու փորձերից:
«Տվյալ պահին ոչ Սպիտակ տանը, ոչ էլ Կրեմլին դա ձեռնտու չէ: Իրաքում այսպես կոչված «Իսլամական խալիֆայության» ստեղծումն ու Ուկրաինայի աճող ճգնաժամը՝ ահա սրանք են երկու տերությունների գլխացավերը»- ընդգծեց փորձագետը:
Այդուհանդերձ, նա իր ուշադրությունն է հրավիրել այն փաստին, որ երկարաժամկետ հեռանկարում հանրապետությունների միջեւ հարաբերությունները հազիվ թե անվրդով լինեն: Մասնավորապես, Ալվրցյանը նկատեց, որ վաղ թե ուշ Մոսկվան եւ Վաշինգոթոնը կլուծեն ընթացիկ խնդիրները եւ այդժամ Հարավային Կովկասում նրանց հետաքրքրությունները կրկին կբախվեն: Մեկ այլ, ոչ պակաս կարեւոր հանգամանք է Վրաստանի, Ադրբեջանի եւ Թուրքիայի միջեւ ռազմավարական համագործակցության խորացումը, ինչը Երեւանի եւ Թբիլիսիի միջեւ հարաբերությունների լարվածության ուժեղացման պատճառ կարող է դառնալ: