«Ռոսաերոնավիգացիայի» վարքագիծը «Էյր Արմենիա» ընկերությանը նյութական վնաս է պատճառել: Այդ մասին այսօր՝ սեպտեմբերի 12-ին, լրագրողներին հայտարարեց «Էյր Արմենիա» հայկական ավիաընկերության գործադիր տնօրեն Արսեն Ավետիսյանը:
Նա նշեց, որ ավիաընկերությունը զուտ տեխնիկական պատճառներով չի կարողացել ժամանակին մարել «Ռոսաերոնավիգացիայի» նկատմամբ իր պարտքը: Ռուսաստանի նկատմամբ արեւմտյան պատժամիջոցների պատճառով նրանք ստիպված են եղել փոխել բանկը, որի միջոցով նախկին վճարումներն էին կատարվում: «Նման իրավիճակները որոշվում են մասնավոր բանակցությունների ճանապարհով, եւ ես չեմ հասկանում՝ ինչու գաղտնիքը հրապարակել եւ մեր ուղեւորների շրջանում անհանգստություն ստեղծել», - hայտարարեց Ավետիսյանը:
Նրա խոսքով, երբ սեպտեմբերի 11-ին ռուսական խոշոր լրատվամիջոցներից մեկը հաղորդագրություն էր տարածել, ըստ որի՝ սեպտեմբերի 21-ից «Ռոսաերոնավիգացիան» դադարեցնում է «Էյր Արմենիայի» սպասարկումը, ընկերությունում տոմսերը հետ վերադարձնելու զանգերի հեղեղ էր: «Մենք թռիչներն իրականացրել ենք սովորականի պես, եւ կշարունակենք թռչել, սակայն ինչպե՞ս մեկ օրվա ընթացքում հազարավոր մարդկանց բացատրել, որ իրականում ամեն բան կարգին է: Արդյունքում մենք բազմաթիվ ուղեւորներ կորցրինք», - հավելեց նա:
Նրա խոսքով՝ «Էյր Արմենիայի» ժամկետանց պարտքը կազմում է 405 հազար դոլար, ընթացիկը՝ ավելի քան 700 հազար դոլար: «Ընթացիկ պարտավորությունը կառավարելի է: Իսկ 405 հազարը մեր ամսական շրջանառության մեկ տասներորդ մասն է կազմում: Ուստի մենք ի վիճակի ենք այն վճարել», - եզրափակեց Ավետիսյանը: