Ռուսաստանաբնակ հայ գործարար Լեւոն Հայրապետյանին մինչեւ դեկտեմբերի 15-ը կալանքի տակ պահելը նախօրոք ծրագրված էր. դեռ 3 օր առաջ Հայրապետյանի բարեկամներն ու մտերիմներն այդ «սցենարի» մասին տեղյակ են եղել:
«Ես ինքս դատական նիստից 3 օր առաջ Մոսկվայում էի, սակայն նիստին չմնացի, վերադարձա Ֆրանսիա, որովհետեւ ամեն ինչ որոշված էր, մենք սցենարին արդեն տեղյակ էինք, հուշել էին, թե ոնց է անցնելու նիստը: Ասեմ, որ վատ բեմադրված թատրոն էր: Ի՞նչ արդարության պետք է սպասել, եթե դատավորները հեռանում են խորհրդակցական սենյակ՝ որոշում կայացնելու, իսկ մենք մեկ-երկու օր առաջ արդեն գիտեինք, թե ինչ են որոշելու»,- NEWS.am-ի հետ զրույցում կայացած դատական նիստն ու որոշումներն այսպես մեկնաբանեց արցախցի գործարարի մտերիմ ընկեր Մացակ Փոլադյանը:
Նրա խոսքով՝ սա հստակ քաղաքական պատվեր է, իսկ «մի փունջ մարդիկ» էլ օգտվում են դրանից՝ առաջ տանելով իրենց ֆինանսական շահերը. «Այս պարագայում պետք է արձագանք լինի Հայաստանից եւ Արցախից: Իհարկե, իշխանությանը հասկանում ենք, որովհետեւ պետություն է, իր շահերն ունի, բայց ինչո՞ւ են հայերն ու ղարաբաղցիները լռում, ո՞ւր են նրանք»:
Հայրապետյանի փաստաբաններին եւ բարեկամներին այս պահին հուզող միակ խնդիրը վերջինիս առողջությունն է: Մացակ Փոլադյանի պնդմամբ՝ Լեւոն Հայրապետյանը մինչեւ դեկտեմբերի 15-ը չի դիմանա այդ պայմաններին, նրան անհապաղ պետք է քաղաքացիական հիվանդանոց տեղափոխել:
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: