Դոմոդեդովոյից (Մոսկվա) Գաբալա (Ադրբեջան) չվերթ իրականացնող A-320 ուղեւորատար ինքնաթիռը, ուղեւորներից մեկի ոչ համարժեք պահվածքի պատճառով, հարկադիր վայրէջք է կատարել Աստրախանի օդանավակայանում: Այս մասին կիրակի «Ինտերֆաքս»-ին տեղեկացրել են օդանավակայանի աշխատակազմից:
«Նախնական տեղեկություններով՝ Դոմոդեդովո-Գաբալա ավիաչվերթի ուղեւորներից մեկը, գտնվելով ալկոհոլի ազդեցության ներքո, սկսել է օդանավում իրեն ոչ համարժեք դրսեւորել, խանգարել է ուղեկցորդուհիների աշխատանքին, չի արձագանքել թռիչքի ընթացքում վարքի կանոններին հետեւելու մասին նրանց պահանջներին»,- նշել է գործակալության զրուցակիցը:
Արդյունքում ինքնաթիռի հրամանատարը որոշել է հարկադիր վայրէջք կատարել Աստրախանի օդանավակայանում: Շաբաթ, Մոսկվայի ժամանակով 19:37-ին A-320-ը բարեհաջող վայրէջք է կատարել Աստրախանում, որտեղ իրավապահները նշված ուղեւորին իջեցրել են օդանավից եւ ձերբակալել:
Ոստիկանությունը պարզում է կատարվածի հանգամանքները: Կարգազանցի ինքնությունը հաստատվել է: Նա Ռուսաստանի քաղաքացի է, Կոստրոմայի շրջանի բնակիչ, ծագումով Ադրբեջանից է: