Մեծ Բրիտանիայի վարչապետ Դեւիդ Քեմերոնը հայտարարել է, որ բրիտանացի պատանդ Դեւիդ Հեյնսի մահվան համար պատասխանատուներին անպայման գտնելու են:
Ելույթ ունենալով հակաճգնաժամային «Կոբրա» հանձնաժողովի նիստում՝ Քեմերոնը մեծարել է 44-ամյա «բրիտանական հերոսին», ով գերեվարվել էր «Իսլամական պետություն» խմբավորման զինյալների կողմից եւ դարձել վերջին շրջանում գլխատված երրորդ օտարերկրացին:
BBC-ի ռուսական ծառայության հաղորդմամբ, վարչապետը նաեւ ասել է, որ Բրիտանիան ցնցվել է՝ իմանալով, որ իր քաղաքացին այդքան ստորաբար սպանվել է: «Իսլամական պետության» զինյալները մահմեդական չեն, նրանք հրեշ են»,- ասել է կառավարության ղեկավարը:
Ավելի վաղ Քեմերոնը «աննախադեպ չարիքի ակտ» էր անվանել համացանցում տարածված տեսանյութը, որտեղ «Իսլամական պետություն» խմբավորման զինյալները գլխատում են բրիտանացի պատանդ Դեւիդ Հեյնսին:
Երկու երեխաների հայր Հեյնսն աշխատում էր ֆրանսիական Acted կազմակերպությունում եւ մարդասիրական օգնություն էր մատակարարում Սիրիայի կարիքավորներին, որտեղ էլ անցյալ տարվա մարտին առեւանգվել էր Իդլիբ նահանգի Աթմե գյուղի մերձակայքում:
