Գերմանիայի կանցլեր Անգելա Մերկելը խստորեն դատապարտել է երկրում հակասեմական տրամադրությունների աճը: Բեռլինի կենտրոնում ելույթ ունենալով զանգվածային ցույցի մասնակիցների առջեւ՝ Մերկելը հայտարարել է, որ Գերմանիայում հրեաների հանդեպ բռնությունը ոչ այլ ինչ է, քան հարձակում ամբողջ հասարակության վրա: Նա նաեւ հավելել է, որ երկիրն այդ չի հանդուրժի:
BBC-ի ռուսական ծառայության փոխանցմամբ, կիրակի մի քանի հազար մարդ հավաքվել է Բրանդենդուրգյան դարպասների մոտ՝ «Այլեւս երբեք հրեաների հանդեպ ատելություն» կարգախոսով:
Գերմանիայի հրեական համայնքի կողմից կազմակերպված ցույցը պատասխան արձագանք էր հրեաների դեմ հնչող արտահայտությունների, որոնց պատճառը Իսրայելի եւ պաղեստինյան ՀԱՄԱՍ խմբավորման միջեւ հակամարտությունն էր:
Վերջերս Մերկելը հայտարարել էր, որ Գերմանիայում հրեական կազմակերպություն կամ կառույց չի մնացել, որոնց ստիպված չլինեին ոստիկանության պաշտպանության տակ վերցնել, եւ այդ իրենց չափազանց անհանգստացնում է:
