«Վանաձոր» քրեակատարոաղական հիմնարկի դատապարտյալ Տիգրան Մելիքյանը արդեն 10 օր գտնվում է հացադուլի մեջ՝ այս կերպ պահանջելով հանդիպում դատարանում իր մեղադրանքը պաշտպանող դատախազ, ներկայումս ՀՀ Շիրակի մարզի դատախազության դատախազ Արմեն Շիրոյանին:
NEWS.am-ը Հելսինկյան Քաղաքացիական Ասամբլեայի Վանաձորի գրասենյակից տեղեկանում է, որ սեպտեմբերի 12-ին Տիգրան Մելիքյանն ահազանգել է ՀՔԱ Վանաձորի գրասենյակ, քանի որ արդեն 7 օր նրա հացադուլին եւ դիմումին ոչ ոք չի արձագանքել: ՀՔԱ Վանաձորի գրասենյակի իրավաբանները փորձել են կապ հաստատել դատախազ Ա. Շիրոյանի հետ՝ տեղեկացնելու կամ տեղեկանալու՝ արդյոք նա տեղյակ է Տիգրան Մելիքյանի դիմումի մասին: Ամբողջ օրվա ընթացքում Ա. Շիրոյանի գորածավարուհին հայտնել է, որ նա զբաղված է եւ չի կարող պատասխանել հեռախոսազանգին, եւ պատասխանելով իրավաբանի վերջին զանգին՝ հայտնել է, որ դատախազը կարգադրել է, որ հեռախոսազանգերին չի ցանկանում պատասխանել: Այսպիսով, դատախազ Ա. Շիրոյանն աշխատանքային ժամին հրաժարվել է պատասխանել ՀՀ քաղաքացու կյանքի եւ մահվան խնդրին վերաբերվող հարցով հեռախոսազանգին:
Դատախազության նամակների բաժնում այնպիսի «օրինապահ» մասնագետներ են աշխատում, որ նույնիսկ դիմումը ստանալու վերաբերյալ տեղեկատվություն տրամադրելու համար գրավոր հարցում են պահանջում: Մինչ դատախազությունում խուսափում են խնդիրներից ու իրենց պարտականությունների կատարումից, Տիգրան Մելիքյանի առողջական վիճակն օր օրի վատթարանում է: Նրա հայրն արդեն մեկ անգամ քաղաքացիական հիվանդանոցից բժիշկ է հրավիրել՝ զննելու որդուն: Բժիշկը հայտնել է, որ Տ. Մելիքյանի առողջական վիճակն անհամատեղելի է հացադուլի հետ: Այսպիսով, ՀՀ քաղաքացին 10 օր է հացադուլի մեջ է, սակայն պատկան մարմիններից ոչ մեկը նրա խնդրի վրա ուշադրություն չի դարձնում: Պարոն Շիրոյան եւ Հայաստանի Հանրապետությունում արդարադատոություն իրականացնող այլ բարձրաստիճան պաշտոնյաներ, հույս ենք հայտնում, որ կկարդաք այս հոդվածն ու որեւէ կերպ կարձագանքեք Տիգրան Մելիքյանի դիմումին: