Թուրքիան «Իսլամական պետություն» ահաբեկչական խմբավորման դեմ իրականացվող քայլերը փորձում է օգտագործել սեփական շահերի համար: Այդ մասին այսօր՝ սեպտեմբերի 15-ին, մամուլի ասուլիսի ժամանակ հայտարարեց արաբագետ Արմեն Պետրոսյանը:
Անդրադառնալով ԻՊ-ի դեմ կոալիցիայի ստեղծման մասին հռչագիրը ստորագրելու հրաժարականից, նա հիշեցրեց, որ 2003թ. Անկարան մասնակցություն չի ունեցել նաեւ ԱՄՆ-ի կողմից նախաձեռնված կոալիցիային ուղղված՝ Իրաքի դեմ ռազմական գործողություններին: «Այժմ պաշտոնական Թուրքիան հայտարարում է Իրաքում թուրքական հյուպատոսարանի 40 աշխատակիցների գերեվարման մասին: Ըստ էության, սա շանտաժի հստակ միջոց է, որի միջոցով, «Իսլամական պետությունը» կարող է դադարեցնել Թուրքիայի մասնակցությունը այդ կոալիցիային», - նշեց է Պետրոսյանը: Արաբագետի խոսքով՝ ԻՊ-ի դեմ արեւմտյան կոալիցիայի կողմից իրականացվող քաղաքականության շրջանակներում քննարկվում է նաեւ քրդական փեշմերգի եւ իրաքյան բանակի զինման հնարավորությունը: «Թուրքիան հայտարարում է, որ եթե նրանք զինում են քրդերին, չի բացառվում, որ վաղն այդ զենքը կհայտնվի Քրդական աշխատավորական կուսակցության ապստամբների ձեռքին, ովքեր տասնամյակներ շարունակ պայքարում են Անկարայի դեմ: Այսինքն, թուրքական տեսակետից, կոալիցիայի մասնակցությունը կնշանակի գործել իր իսկ դեմ», - կարծիք հայտնեց արաբագետը: Եվ, երրորդը, ընդգծեց Արմեն Պետրոսյանը, Թուրքիան որոշակի սպասողական դիրք է գրավել, քանի որ ոչ ոք չի կարող հստակորեն ասել՝ ինչի կարող են հանգեցնել այդ ռազմական գործողությունները: Չի բացառվում թուրքական իշխանությունների կողմից իրավիճակային որոշումների ընդունումը», - եզրափակեց փորձագետը:
Հիշեցնենք, որ սեպտեմբերի 11-ին սաուդյան Ջիդա քաղաքում մի շարք արաբական երկրների առաջնորդներ ստորագրել են Վաշինգթոնի կողմից մշակված «Իսլամական պետություն» ահաբեկչական խմբավորման դեմ կոալիցիայի ստեղծման մասին եզրափակիչ հռչակագիր: Փաստաթուղթը ստորագրել են Իրաքի, Լիբանանի, Եգիպտոսի, Հորդանանի արտգործնախարարները, ինչպես նաեւ Պարսից ծոցի արաբական պետությունների համագործակցության խորհրդի մի շարք երկրներ: