Լեռնային Ղարաբաղի Հանրապետության արտաքին գործերի նախարար Կարեն Միրզոյանը, սեպտեմբերի 13-ին Բասկերի Երկրի Դոնոստիայի (Սան Սեբաստիան) քաղաքապետարանում հանդիպում է ունեցել քաղաքապետ Խուան Կառլոս Իզագիրե Օրտելանոյի հետ, որի ընթացքում կողմերը մտքեր են փոխանակել Ստեփանակերտի եւ Դոնոստիայի միջեւ բարեկամական եւ գործնական փոխշահավետ հարաբերությունների հաստատման եւ զարգացման հեռանկարների շուրջ։
ԼՂՀ ԱԳՆ մամուլի ծառայությունից հայտնում են, որ հանդիպման արդյունքներով Ստեփանակերտ եւ Դոնոստիա քաղաքների միջեւ ստորագրվել է Համագործակցության համաձայնագիր։
Համաձայնագրում նշվում է, որ կողմերը հիմնվելով հավասարության եւ փոխշահավետության սկզբունքների վրա իրականացնելու են փորձի փոխանակում եւ համագործակցություն տարբեր բնագավառներում։
Ըստ Համաձայնագրի` երկու քաղաքները եւ նրանց համապատասխան կառույցները պարբերաբար շփումներ են ունենալու՝ քննարկելու համագործակցության խնդիրները, ինչպես նաեւ փոխադարձ հետաքրքրություն ներկայացնող այլ հարցեր։
Նշենք, որ դոնոստիա (Սան Սեբաստիան) քաղաքը Բասկերի երկրի Գիպուսկոա նահանգի մայրաքաղաքն է, երկրի ամենահայտնի զբոսաշրջային կենտրոններից մեկն է։ Հայտնի է ֆիլմերի միջազգային փառատոնով։ Դոնոստիա քաղաքը Եվրամիության կողմից հայտարարվել է 2016 թ. Եվրոպայի մշակութային մայրաքաղաք։
