Սեպտեմբերի 22-26-ը Երեւանի պետհամալսարանի հյուրատանը միջազգային աշխատանքային խորհրդակցություն է անցկացվելու՝ «Դաշտերի եւ լարերի տեսության սահմանները» թեմայով: Հավաքին մասնակցելու են տեսական ֆիզիկայի առավել բարդ եւ ֆունդամենտալ բնագավառների՝ դաշտերի քվանտային տեսության եւ լարերի տեսության փորձագետները:
Համաժողովի նախաձեռնողները միջազգային մակարդակի տեսաբան-ֆիզիկոսներ են. Գերմանիայի Ալբերտ Էնշտեյնի համալսարանի առաջատար հետազոտող Շտեֆան Թայսենը եւ Ֆրանսիայի Տեսական ֆիզիկայի ինստիտուտի լարային հետազոտությունների տնօրեն Ռուբեն Մինասյանը:
Հայաստանից համաժողովի կազմակերպիչներն են Ռուբեն Մանվելյանն ու Ռուբիկ Պողոսյանը (Երեւանի Ֆիզիկայի ինստիտուտի տեսական բաժին), Արմեն Ներսեսյանն ու Արմեն Սաղաթելյանը (ԵՊՀ տեսական ֆիզիկայի լաբորատորիա): Համաժողովն ամբողջությամբ ֆինանսավորում է Ֆոլքսվագենի հիմնադրամի (Volkswagenstiftung) «Եվրոպայի եւ Արեւելքի միջեւ. Ուշադրություն Հարավային Կովկասի եւ Կենտրոնական Ասիայի երկրների բարձրագույն կրթության եւ գիտության ուղղությամբ» ծրագրի շրջանակում:
Խորհրդակցությանն իրենց մասնակցությունը հաստատել են 20 առաջատար տեսաբան-ֆիզիկոսներ Գերմանիայից, Ֆրանսիայից, Իտալիայից, Շվեյցարիայից, Մեծ Բրիտանիայից, Բելգիայից, Շվեդիայից, ԱՄՆ-ից, Ռուսաստանից:
Աշխատանքային խորհրդակցության անցկացման նախաձեռնողը Ռուբեն Մինասյանն է. լարերի տեսության բնագավառում ճանաչված մասնագետ, ծնունդով՝ Երեւանից: Այս նախագիծը նրա առաջին, բայց ոչ վերջին փորձն է՝ Հայաստանի գիտական կյանքի կազմակերպմանը մասնակցության առումով: