Չնայած Ռուսաստանի եւ Արեւմուտքի միջեւ աճող դիմադրությանը՝ Կրեմլն ու Սպիտակ տունը միակարծիք են Լեռնային Ղարաբաղի հարցում: Այդ մասին այսօր՝ սեպտեմբերի 16-ին, մամուլի ասուլիսի ժամանակ հայտարարեց Կովկասի ինստիտուտի փոխտնօրեն Սերգեյ Մինասյանը: Նրա խոսքով՝ այդ մասին են վկայում ինչպես Սոչիի, այնպես էլ Ուլեսում կայացած եռակողմ հանդիուպմը, որտեղ բոլոր կողմերը հաստատեցին, որ հայ-ադրբեջանական ուժերի շփման գծում ռազմական գործողությունները անընդունելի են: Բացի այդ, ԵԱՀԿ Մինսկի խումբը կրկին ապացուցեց իր կենսունակությունը, նշեց քաղաքագետը:
Մեկնաբանելով Բաքվի բարձրագույն ղեկավարության կողմից ոչ վաղ արված բարձրագոչ հայտարարությունները, եւ դրանից հետո բանակցությունների ժամանակ հավասարակշռված դիրքորոշումը՝ Մինասյանը նշեց. «Չնայած նրան, որ այս շիլան պատրաստեցին ադրբեջանական իշխանությունները, Բաքվում շատ լավ են պատկերացնում պատերազմի գինը եւ հազիվ թե վճռեն վճարել դրա համար, հատկապես օգոստոսյան իրադարձություններից հետո, երբ կրկին ակնհայտ դարձավ, որ Հայաստանը ոչնչով չի զիջում, ավելին՝ ռազմատեխնիկական համատեքստում դեռ մի բան էլ գերազանցում է Ադրբեջանին»:
Հիշեցնենք, որ Հայաստանի, Ռուսաստանի եւ Ադրբեջանի նախագահները օգոստոսի 10-ին ռուսական կողմի նախաձեռնությամբ հանդիպեցին Սոչիում: Սեպտեմբերի 5-ին, Ուլեսում՝ ՆԱՏՕ-ի գագաթնաժողովի շրջանակներում, ամերիկյան կողմի նախաձեռնությամբ տեղի ունեցավ Սարգսյան-Ալիեւ-Քերի եռակողմ հանդիպումը: