Ազգային ժողովի ՀՅԴ խմբակցությունը շարունակելու է համագործակցությունը ոչ իշխանական երեք ուժերի՝ ԲՀԿ-ի, ՀԱԿ-ի եւ «Ժառանգության» հետ. կլինեն խնդիրներ, որոնց շուրջ չորս ուժերը միասնական դիրքորոշում կհայտնեն եւ միասին կպայքարեն։ Այս մասին այսօր՝ սեպտեմբերի 17-ին, քառյակի նիստից հետո լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանը՝ պատասխանելով հարցին, թե հնարավո՞ր է քաղաքական ուժը դուրս գա քառյակից եւ կոալիցիա կազմի ՀՀԿ-ի հետ։

«Մենք կոալիցիա չենք մտնելու։ Ինչ վերաբերվում է քառյակին, ապա իրենք իրավունք ունեն քարոզել իրենց տեսակետը, մենք էլ՝ մերը։ Թող հանրահավաքին որոշվի, թե ում տեսակետը հաղթեց։ Եթե այնպես ստացվի, որ Սահմանադրական բարեփոխումների շուրջ մեր հարաբերությունները փակուղի մտնեն, դա մեզ չի խանգարի շարունակել մեր համագործակցությունը մյուս հիմնախնդիրների շուրջ»,- ասաց նա։

Նշենք, որ ոչ իշխանական երեք ուժերի (ԲՀԿ, ՀԱԿ, «Ժառանգություն») համատեղ հանրահավաքը տեղի կունենա հոկտեմբերի 10-ին Ազատության հրապարակում։ Սահմանադրական բարեփոխումների շուրջ տարաձայնությունների պատճառով ՀՅԴ-ն այսօր հրաժարվել է մասնակցել հանրահավաքին։