Ուելսում Հայաստանի եւ Ադրբեջանի նախագահների հանդիպումը Պետդեպի ղեկավարի հետ ապացուցեց, որ ղարաբաղյան կարգավորումը առաջնային է ԱՄՆ-ի եւ ՆԱՏՕ-ի համար, թեեւ Հյուսիսատլանտյան դաշինքը անմիջական մասնացկություն չունի բանակցային գործընթացին: Այս մասին սեպտեմբերի 17-ին «ՆԱՏՕ-ի գագաթաժողովի ազդեցությունը Հայաստանի եւ Հարավային Կովկասի վրա» թեմայով քննարկմանը հայտարարել է ՀՀԿ-ական պատգամավոր, Ազգային ժողովի պաշտպանու¬թյան, ներքին գործերի, ազգային անվտանգության հանձնաժողովի նախագահ Կորյուն Նահապետյանը:
Նա հիշեցրել է, որ Ուելսում ՆԱՏՕ-ի գագաթաժողովի շրջանակում տեղի է ունեցել Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի նախապես չհայտարարված հանդիպումը ԱՄՆ պետքարտուղար Ջոն Քերիի հետ: «Հանդիպումը կարեւոր էր ինչպես Հայաստանի, այնպես էլ ՆԱՏՕ-ի համար: Այն ցույց տվեց, որ ՆԱՏՕ-ի մոտեցումները համահունչ են Հայաստան մոտեցումներին: Կայացած հանդիպումն ազդանշան էր նաեւ Ալիեւին՝ ղարաբաղյան հիմնախնդրի խաղաղ կարգավորմանը վերադառնալու համար», - ընդգծել է Կորյուն Նահապետյանը:
