ՀՀ Բնապահպանության նախարար Արամայիս Գրիգորյանն այսօր ընդունել է Գերմանիայի բնության պահպանության միության /NABU/ Կովկասյան ծրագրերի ղեկավար Վիտալի Կովալյովին եւ NABU հայաստանյան մասնաճյուղի ղեկավար Նարեկ Գրիգորյանին:
Վիտալի Կովալյովը, շնորհակալություն հայտնելով ընդունելության համար եւ շնորհավորելով Արամայիս Գրիգորյանին այս պատասխանատու պաշտոնում նշանակվելու առթիվ, հույս է հայտնել, որ ՀՀ Բնապահպանության նախարարության եւ NABU-ի երկարամյա համագործակցությունը կշարունակվի առաջիկայում եւս:
Նախարար Արամայիս Գրիգորյանը շնորհակալություն հայտնելով շնորհավորանքի համար՝ իր հերթին կարեւորել է երկու կառույցների երկարամյա սերտ համագործակցությունը եւ այն, որ NABU-ի տարածաշրջանային գրասենյակը գտնվում է Հայաստանում, ինչը փաստում է, որ առաջիկայում եւս կողմերի համագործակցությունը կլինի բավականին ակտիվ, իսկ արդյունքներն առավել շոշափելի: Կողմերը քննարկել են Արարատյան արտեզյան ավազանի ջրային ռեսուրսների խնայողության, դրանց արդյունավետ շահագործման եւ կառավարման ավտոմատ համակարգի անցման շրջանակներում համատեղ ծրագրեր ձեռնարկելու, Հայաստանի բնության հատուկ պահպանվող տարածքներում էկոտուրիզմի զարգացման հնարավորություններն ընդլայնելու եւ այդ տարածքների կառավարումն առավել արդյունավետ եւ ժամանակակից դարձնելու հարցերը եւ պատրաստակամություն հայտնել այս ուղղություններով մոտ ապագայում հանդիպել արդեն կոնկրետ նախագծային քննարկումների իրականացնելու նպատակով: