Ուկրաինայի նախագահ Պյոտր Պորոշենկոն ԱՄՆ-ին կոչ է անում շարունակել Ռուսաստանի դեմ տնտեսական պատժամիջոցները: Ըստ ՈՒՆԻԱՆ-ի, այս մասին ուկրաինական նախագահը հայտարարել է այսօր Վաշինգտոնում ԱՄՆ Կոնգրեսի պալատների համատեղ նիստի ժամանակ:
«Խնդրում եմ, որպեսզի ԱՄՆ-ն ուժեղ լինի եւ շարունակի հետեւել իր սկզբունքներին եւ ագրեսորի դեմ հետագա պատժամիջոցներին: Տնտեսական պատժամիջոցները կարեւոր են բազմաթիվ պատճառներով. դրանք օգնեցին ընտրություն կատարել լավի եւ վատի միջեւ, պաշտպանել բարոյական հիմքերը եւ ուշադրություն չդարձնել պրագմատիզմին»,- ասել է նա: Պորոշենկոն նշել է, որ Ռուսաստանի կողմից Ուկրաինայի դեմ պատերազմը «պատերազմ է ազատության, ժողովրդավարության, եվրոպական արժեքների դեմ»:
Ուկրաինական պետության ղեկավարը հիշեցրել է, որ Ուկրաինայի Գերագույն Ռադան վավերացրել է Եվրամիության հետ Ասոցացման համաձայնագիրը եւ ուկրաինական ժողովուրդն ընտրություն է կատարել եվրոպական արժեքների օգտին: «Մեկ այլ ազգ որոշել է Ուկրաինային պատժել այդ քայլերի համար: Աշխարհը չի կարող նման պահվածք թույլ տալ»,- ընդգծել է Պորոշենկոն:
