Ուկրաինայի եւ Եվրամիության միջեւ Ազատ առեւտրի գոտու պայմանագրի իրագործման հետաձգումը որոշակի լրացուցիչ բոնուս է Ուկրաինայի տնտեսության համար: Այս մասին NEWS.am-ի թղթակցի հետ զրույցում հայտարարեց Հայաստանում Ուկրաինայի արտակարգ եւ լիազոր դեսպան Իվան Կուխտան:
Դիվանագետը հիշեցրեց, որ սեպտեմբերի 16-ին Գերագույն Ռադան վավերացրեց Ուկրաինայի եւ Եվրամիության միջեւ Ասոցացման համաձայնագիրը: «Հարկավոր է ընդգծել, որ վավերացումը տեղի ունեցավ Եվրախորհրդարանում վավերացման հետ միաժամանակ եւ դարձավ «Արեւելյան գործընկերության» ծրագրի եզրափակիչ փուլերից մեկը: Ելույթ ունենալով խորհրդարանում՝ Ուկրաինայի նախագահն ընդգծեց, որ փաստորեն այդ համաձայնագրի վավերացմամբ Ուկրաինան ընտրեց իր եվրոպական ուղին, եւ հիմա շատ մեծ ու դժվարին աշխատանք ունի անելու՝ այդ համաձայնագիրն իրագործելու համար»,- նշեց Իվան Կուխտան:
Նա պարզաբանեց, որ անհրաժեշտ կլինի ե՛ւ նորմատիվ փաստաթղթերը, ե՛ւ օրենսդրությունը համապատասխանեցնել Եվրամիության չափանիշներին: «Մեկ տարով՝ մինչեւ 2015 թվականի դեկտեմբերի 31-ը Ուկրաինայի եւ Եվրամիության միջեւ համաձայնագրի մի մասի իրագործման հետաձգման վերաբերյալ Բրյուսելում Ռուսաստանի, Ուկրաինայի եւ Եվրահանձնաժողովի ընդունած եռակողմ համատեղ հայտարարության վրա շատ մեծ նշանակություն ունեցավ նաեւ հասարակության արձագանքը: Այդ մասը վերաբերում է Ազատ առեւտրի գոտու համաձայնագրի իրագործմանը»,- ընդգծեց ուկրաինական դեսպանը:
Նրա խոսքով, երկրի ղեկավարությունը պարզաբանեց, որ Ազատ առեւտրի գոտու մասին պայմանագրի իրագործման հետաձգումը մի շարք հնարավորություններ է տալիս Ուկրաինային: «Այդ ընթացքում՝ գրեթե մեկուկես տարի, Ուկրաինան Եվրամիություն իր ապրանքները կարող է արտահանել զրոյական դրույքաչափով, իսկ ԵՄ երկրներն Ուկրաինա ապրանքներ կներմուծեն նույն դրույքաչափով, ինչպես այդ արվում է այսօր: Փաստորեն, դա լրացուցիչ բոնուս է Ուկրաինայի համար քանի որ Ուկրաինայի եւ Եվրամիության միջեւ առեւտրից ամբողջ գումարը կմտնի պետբյուջե: Եվ, բնականաբար, Ուկրաինան կշարունակի խորհրդակցությունները Ռուսաստանի հետ, քանի որ մենք մեծ ապրանքաշրջանառություն ունենք ոչ միայն Ռուսաստանի, այլեւ ԱՊՀ այլ երկրների հետ, որոնց հետ ազատ առեւտրի գոտի գոյություն ունի»,- հայտարարեց Իվան Կուխտան:
Հիշեցնենք, որ Ուկրաինան Եվրամիության հետ Ասոցացման համաձայնագիրը վերջնականապես ստորագրեց այս տարվա հունիսի 27-ին:
