Հայաստանում Դաշնակցությունն ամենազնիվ քաղաքական ուժն է եւ միշտ էլ պահանջել է, որ լինի խորհրդարանական կառավարման համակարգ: ՀՅԴ-ի` քառյակին հանրահավաքին չմասնակցելու պատճառն այսպես է մեկնաբանում քաղտեխնոլոգ Կարեն Քոչարյանը:
«Դաշնակցությունը իշխանությունից դուրս է եկել ընդամենը մի պահանջով` այն էլ արտաքին քաղաքական հարցի պատճառով: Մյուս կողմից ՀՅԴ-ն առավել ազնիվն է, եւ միշտ էլ պահանջել են, որ լինի խորհրդարանական կառավարման համակարգ: Նրանք երբեք ընդգծված առաջատար չեն ունեցել: Հետեւաբար, ցանկանում են խորհրդարանական կառավարման համակարգ: Այնպես որ մյուս ուժերի կողքին ամենազնիվն է»,- այսօր` սեպտեմբերի 19-ին, լրագրողների հետ զրույցում ասաց քաղտեխնոլոգը:
Նշենք, որ հոկտեմբերի 10-ին Ազատության հրապարակում տեղի կունենա ոչ իշխանական քառյակից երեքի (ԲՀԿ, ՀԱԿ, «Ժառանգություն») համատեղ հանրահավաքը, որին ՀՅԴ-ն սակայն չի մասնակցելու: Որպես պատճառ` նշվում են Սահմանադրական բարեփոխումների մասին տարակարծությունը: Հիշեցնենք, որ քառյակի երեք ուժերը` ԲՀԿ-ն, ՀԱԿ-ն ու «Ժառանգությունը» դեմ են Սահմանադրական բարեփոխումներին եւ հանրահավաքի ժամանակ հենց այդ մասին էլ խոսելու են:
