Քառյակի վերջին նիստում արձանագրվեց, որ սահմանադրական փոփոխությունների հարցով կա առանցքային խնդիր, բայց որոշվել է, որ մյուս բոլոր հարցերում համագործակցությունը շարունակվելու է եւ առավելագույնս պետք է կոռեկտ լինել միմյանց նկատմամբ: Այս մասին, այսօր՝ սեպտեմբերի 19-ին, լրագրողների հետ հանդիպման ժամանակ նշել է ՀՅԴ խմբակցության քարտուղար Աղվան Վարդանյանը:
Անդրադառնալով այն փաստին, որ որոշ լրատվամիջոցներում փորձ է արվում հոկտեմբերի 10-ի հանրահավաքին ՀՅԴ չմասնակցելու որոշումից հետո պիտակավորել Դաշնակցությանը, Աղվան Վարդանյանն ասել է, որ իրենք սպասում էին նման արձագանքների. «Այդ քայլն անելուց հետո գիտակցում էինք, որ կլինեն այդ կարգի արձագանքներ, բայց մենք վստահ ենք մեր որոշումներում, հակառակ դեպքում, եթե տրվեինք տարբեր արձագանքներին, ապա կլինեինք մեկ այլ բան, բայց` ոչ պատասխանատվություն ունեցող քաղաքական ուժ: Շեքսպիրն ասում է` «կատուն կմլավի, շունն էլ կհաչի»:
Ինչ վերաբերում է ՀՅԴ-ի հիշյալ որոշման պատճառներին, ՀՅԴ խմբակցության քարտուղարը նշել է, որ հանրահավաքի ժամանակ հնարավոր չէր շրջանցել սահմանադրական բարեփոխումների թեման, որի վերաբերյալ քառյակի մյուս ուժերի հետ իրենց կարծիքները տարբերվում են:
Նշենք, որ ոչ իշխանական երեք ուժերի (ԲՀԿ, ՀԱԿ, «Ժառանգություն») համատեղ հանրահավաքը տեղի կունենա հոկտեմբերի 10-ին Ազատության հրապարակում։ Սահմանադրական բարեփոխումների շուրջ տարաձայնությունների պատճառով ՀՅԴ-ն հրաժարվել է մասնակցել հանրահավաքին: Այս որոշումից հետո տարբեր շրջանակներ ՀՅԴ-ին մեղադրեցին իշխանությունների կողմն անցնելու եւ քառյակին դավաճանելու մեջ: