Հարկավոր է անել ամեն հնարավորը Հայաստանի անկախության ամրապնդման համար, դրա համար կա մեկ ուղի՝ կառուցել ամուր, ժողովրդավար հանրապետություն, ինչպես որ նշված է Սահմանադրությունում:
Այս մասին Անկախության օրվա առթիվ NEWS.am-ի թղթակցի հետ զրույցում ասաց ՀՀ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը:
«Ես չէի ցանկանա, որպեսզի մենք միայն սեպտեմբերի 21-ին գնահատեինք մեր անկախությունը, խոսեինք մեր ձեռքբերումների եւ բացթողումների մասին: Այնպիսի տպավորություն է, որ մեզ համար անկախությունը ընդամենը վերացական օր է՝ օրացույցում նշելու համար, որը պետք է հիշել, որի համար պետք է պայքարել եւ աշխատել միայն նրա համար, որպեսզի ձանձրալի, հոգեցունց հայտարարություններ անել», - նշել է Զոհրաբյանը: Ըստ նրա՝ այս օրերին կարելի է լսել բազմաթիվ հայտարարություններ, որ անկախությունը բարձր արժեք է: Ընդ որում այդ հայտարարություններն անում են այն քաղաքական գործիչները, որոնք իրենց պաշտոնով անում են ամեն ինչ՝ Հայաստանի անկախությանը վնասելու համար, ամեն ինչ երկրի ինքիշխանությանը դեմ են անում: «Կարծում եմ՝ մենք անկախությունը պետք է գնահատենք ոչ կեղծ հայրենասիրական պաթոսով, որից իմ սիրտն անձամբ խառնում է, երբ խորհրդարանում ողբերգական տեքստեր եմ լսում՝ երրորդ դասարանի շարադրության մակարդակի: Հայրենասիրությունը պետք է գործով ապացուցվի, հայրենասիրությունն այն է, որ յուրաքանչյուրն անի ամեն ինչ՝ երկրի անկախությունն ամրապնդելու համար», - ընդգծել է պատգամավորը: Նա հավելել է, որ անհրաժեշտ է կառուցել այնպիսի երկիր, որտեղ իշխանությունը պատկանում է ժողովրդին: «Սակայն այսօր մենք այդպիսի երկիր չունենք: Մենք պետք է այնպես աշխատենք, որպեսզի ունենանք այնպիսի երկիր, որի հետ հաշվի նստեն, որի խոսքը հարգում են, որի հետ բանակցում են հավասար պայմաններում, այլ ոչ թե՝ որպես վասալի: Միայն այդ դեպքում մենք կարող ենք ամեն տարի սեպտեմբերի 21-ին ասել, որ մեր անկախությունն ամրապնդվել է եւ մենք ավելի ինքիշխան ենք», - նշել է Նաիրա Զոհրաբյանը:
Հայաստանի Գերագույն խորհրդի որոշմամբ 1991թ. սեպտեմբերի 21-ին անցկացվեց հանրաքվե՝ հանրապետությունը Խորհրդային Միության կազմից դուրս բերելու եւ անկախ պետություն ստեղծելու մասին։Անկախությունը խորհրդարանի կողմից պաշտոնապես հռչակվեց սեպտեմբերի 23-ին։
