Գյումրիի պետական մանկավարժական ինստիտուտի ռեկտորի եղբոր՝ Հարություն Գրիգորյանի սպանության մեջ մեղադրվող Արման Կատունյանի խափանման միջոց կալանավորումը եւս երկու ամսով երկարացվել է: Այս մասին NEWS.am-ին ասաց մեղադրյալի փաստաբան Երվանդ Վարոսյանը:
«Մենք Վերաքննիչ դատարան էինք դիմել, որ խափանման միջոցը փոխվի, բայց Վերաքննիչն առաջին ատյանի դատարանի կայացրած որոշումը թողեց անփոփոխ, իսկ Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանն էլ երկու ամսով երկարացրեց կալանքը: Մենք սակայն կարծում ենք, որ դրա համար հիմքեր չկային»,- ասաց նա:
Երվանդ Վարոսյանի խոսքով՝ այս գործով նշանակվել են բազմաթիվ փորձաքննություններ, որոնց եզրակացությունները դեռ չեն ստացվել:
Նշենք, որ Կատունյանը ՊՆ Շիրակի մարզի Ռազմական ոստիկանության քրեական հետախուզության բաժնի պետն էր։ Ըստ Գյումրիում տարածված տեղեկությունների՝ սպանության դրդապատճառը խանդն է։ Կատունյանի խոսքով՝ ռեկտորի եղբայրը երկար ժամանակ սիրահետել է իր կնոջը։ Նրան մեղադրանք է առաջադրվել ՀՀ ՔՕ 104 հոդվածի առաջին եւ 235 հոդվածի առաջին մասերով (ապօրինաբար, դիտավորությամբ մեկ ուրիշին կյանքից զրկելը եւ ապօրինի զենք կրելը): Արման Կատունյանը կալանավորված է եւ գտնվում է «Վարդաշեն» քրեակատարողական հիմնարկում:
Ավելի վաղ NEWS.am-ը հայտնել էր, որ Շիրակի մարզում hուլիսի 24-ին ժամը 16:00-ի սահմանում, Գետք համայնքի չօգտագործվող ֆերմաներից մեկի տարածքում գտել էին Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային տարբեր վնասվածքով։
