Վանաձորում 2013թ.-ի հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի գործով կալանավորված՝ Լոռու մարզի գլխավոր վիրաբույժ Վլադիմիր Ղուկասյանը տառապում է շաքարային դիաբետով եւ այժմ կալանավայրում դեղեր է ընդունում: Այս մասին NEWS.am-ին ասաց մեղադրյալի փաստաբան Մհեր Դավթյանը:
«Վլադիմիր Ղուկասյանն այս պահին կալանավայրում բուժում է ստանում, բայց վիճակն այնքան վատ չէ, որ «Դատապարտյալների հիվանդանոց» տեղափոխեն: Մենք այժմ ամեն ինչ անում ենք, որ նրա խափանման միջոցը փոխեն եւ ազատ արձակեն: Վերաքննիչ դատարանը, սակայն, դեռ բողոքի քննության օրը չի նշանակել: Սպասում ենք»,- ասաց նա:
Հարցին, թե այս գործով երկու կալանավորված անձ կա, հնարավոր է միասին քննվեն՝ փաստաբանը պատասխանեց. «Սրանք առանձին քրեական գործեր են, միմյանց հետ ոչ մի կապ չունեն: Մեզ համար էական էլ չէ, թե ինչ է արել Կարեն Կոնգուրցեւը, ինչում են նրան մեղադրում: Մեզ առաջադրված մեղադրանքն այլ բովանդակություն ունի եւ շաղկապվածություն ինքս չեմ տեսնում»:
Նշենք, որ 15-ամյա հանդբոլիստի դանակահարելու մեղադրանքով կալանավորվել է 23-ամյա Կարենը, որի գործով նախաքննությունն ավարտվել է, եւ գործն ուղարկվել դատարան:
Հիշեցնենք, որ ըստ ոստիկանության՝ 2013թ. հոկտեմբերի 12-ին, ժամը 19.35-ին, «Վանաձոր» բժշկական կենտրոն է տեղափոխվել Երեւանի բնակիչ, 15-ամյա Դավիթ Հովակիմյանը՝ «կրծքավանդակի ծակած վերք» ախտորոշմամբ: Նույն օրը ժամը 22.00-ի սահմաններում Դ. Հովակիմյանը հիվանդանոցում մահացել է: Հոկտեմբերի 13-ին, ժամը 01.50-ին սպանությունը կատարելու կասկածանքով իր բնակարանից բերման է ենթարկվել 1991թ. ծնված, նախկինում դատապարտված Կարեն Կ.-ն՝ «Քուրդ» մականունով: Պարզվել է, որ նա հոկտեմբերի 12-ին ժամը 19.20-ի սահմաններում Վանաձորի Կ. Դեմիրճյան փողոցի հարեւանությամբ գտնվող այգում, վիճաբանության ժամանակ, դանակով հարվածել է Դ. Հովակիմյանին եւ պատճառել մահ: Այս գործով 2014թ. սեպտեմբերին կալանավորվել է «Վանաձոր» բժշկական կենտրոնի վիրաբուժական բաժնի վարիչ Վլադիմիր Ղուկասյանը, որն ըստ նախնական մեղադրանքի՝ թերացել է աշխատանքում, որն էլ առաջացրել է 15-ամյա հանդբոլիստի մահը: Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: