ԱՄՆ-ի նախկին նախագահ Բիլ Քլինթոնը CNN-ի հետ հարցազրույցում հայտարարել է, որ մինչեւ հոկտեմբերի 1-ը հույս ունի պապիկ դառնալ: Ավելի վաղ Բիլ եւ Հիլարի Քլինթոնները, չթաքցնելով բերկրանքը, որեւէ մեկնաբանություն չէին տալիս իրենց դուստր Չելսիի հղիության վերաբերյալ:
Բիլ Քլինթոնը հայտարարել է. «Հուսով եմ, որ մինչեւ հոկտեմբերի 1-ը պապիկ կդառնամ: Չեմ համբերում: Այժմ մենք սպասում ենք ամեն րոպե»: Նա նաեւ նշել է, որ երեխայի սեռը այս պահին հայտնի չէ: «Ես չգիտեմ: Իմ աղջիկն ու փեսան նախընտրեցին չիմանալ: Նրանք անակնկալ են ուզում», փոխանցում է Gazeta.ru-ն:
Հիլարի Քլինթոնը եւս անցած ուրբաթ անկեղծացել էր՝ ասելով, որ շատ է մտածում` թոռնիկն աղջիկ է լինելու, թե` տղա:
Հիշեցնենք, որ Չելսի Քլինթոնի եւ նրա ամուսին Մարկ Մեզվինսկիի սպասվող առաջնեկի մասին լուրը հաղորդվել էր դեռեւս ապրիլին: Չելսին այն ժամանակ ասել էր. «Ես հուսով եմ, որ իմ երեխաների համար կլինեմ իմ մոր նման լավ մայրիկ»: