Երեւանի տարբեր տոնավաճառների շուրջ մի քանի հարյուր աշխատակիցները հավաքվել են կառավարության շենքի մոտ, որտեղ իրենց բողոքն են հայտնում հոկտեմբերի 1-ից ուժի մեջ մտնող «Շրջանառության հարկի մասին» ՀՀ օրենքի դեմ:
Ըստ այդ օրենքի՝ նրանք պիտի իրենց ապրանքաշրջանառության վերաբերյալ փաստաթղթեր ներկայացնեն համապատասխան մարմիններ, սակայն խոշոր բիզնեսի ներկայացուցիչները հաճախ ապրանքների վերաբերյալ փաստաթղթեր չեն տրամադրում փոքր ու միջին ձեռնարկություններին: Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով:
Տոնավաճառների աշխատակիցները բողոքում են, որ մի քանի օր առաջ իրենց տեղեկացրել են, որ այսուհետեւ իրենք պետք է ամեն օր իրենց վաճառած ապրանքների մասին ճշգրիտ տեղեկություն տրամադրեն հարկային մարմնին:
«Օրական երեք հազար դրամ ենք վաստակում, որը մեր հացի գումարն է: Օրենք գրողները եկել, տեսե՞լ են, թե ինչ է կատարվում շուկայում: Հիմա ես 5 նասկի վաճառեմ, մեկը պակաս ասեմ, ինձ դրա համար կտուգանեն: Վարչապետը մինչեւ այդ խոստումներ էր տալիս…»,- բողոքում են բնակիչները:
Կառավարության դիմումների ու նամակների վարչության պետ Ալեքսանդր Ղազարյանը ցուցարարներին առաջարկեց 10 հոգով բարձրանալ՝ վարչապետի հետ խնդիրը քննարկելու համար, սակայն բողոքող քաղաքացիները չհամաձայնեցին եւ անդադար վանկարկում էին՝ «վարչապետ, վարչապետ»՝ պահանջելով, որ նա անձամբ իջնի իրենց հետ խոսելու։
Ի վերջո, վարչապետ Հովիկ Աբրահամյանը դուրս եկավ շենքից եւ այժմ զրուցում է ցուցարարների հետ։