Մեծի Տանն Կիլիկիո կաթողիկոս Արամ Ա-ն դատապարտել է Դեր Զորում հայկական եկեղեցու ավերումը: Այս մասին նա գրել է Facebook-ի իր էջում:
«Արամ Ա. Կաթողիկոսը խոր ցավով եւ հուզումով տեղեկացավ Տեր Զորի եկեղեցու ականահարման մասին: Վեհափառ Հայրապետին հասած տեղեկության համաձայն, ծրագրված ոճիր է Տեր Զորի մեջ Հայոց Ցեղասպանության նահատակներին նվիրված եկեղեցու, նրան կից գտնվող թանգարանի եւ համալիրի ականահարումը ոճրագործների կողմից:
Վեհափառ Հայրապետը խստիվ դատապարտելով հիշյալ ոճրային արարքը ասել է. «Հայոց Ցեղասպանության 100-ամյակի շեմին եւ Հայաստանի hանրապետության անկախության 23-րդ տարեդարձի օրը կատարված այս ոճիրը, մենք բարբարոսային արարք ենք համարում: Այս ոճրի հետեւում գտնվող ձեռքերը թող իմանան, որ մեր նահատակների հիշատակը եւ հանուն արդարության մեր ժողովրդի պայքարը խորհրդանշող Տեր Զորը, որպես Հայոց ցեղասպանության նահատակների սրբավայր, չի կարելի քանդել մեր ժողովրդի հավաքական հիշողության մեջ»:
Նշենք, որ սեպտեմբերի 21-ին «Իրաքի եւ Լեւանտի (Շամի) իսլամական պետություն» ահաբեկչական խմբավորումն ականապատել եւ պայթեցրել էր Դեյր էզ Զորի Սրբոց Նահատակաց հայկական եկեղեցին: NEWS.am-ին Հալեպում Հայ առաքելական եկեղեցու Բերիո թեմի մամուլի քարտուղար Ժիրայր Ռեիսյանը հայտնել էր, որ կոտրվել են եկեղեցու ապակիները, կան ճաքեր, սակայն շինությունը ավերված չէ: «Վերականգնողական աշխատանքները կսկվեն մարտական գործողությունների ավարտից հետո», - հավելել էր Ռեիսյանը: