Խորհրդարանական եռյակի միասնականությունը ժամանակավոր է եւ անլուրջ, սեպտեմբերի 23-ի մամուլի ասուլիսում հայտարարել է ՀՀԿ-ական պատգամավոր Լեռնիկ Ալեքսանյանը:
Ըստ նրա՝ բանն այն է, որ ԲՀԿ-ն, «Ժառանգությունը» եւ ՀԱԿ-ը տարբեր նպատակներ են հետապնդում, ունեն գաղափարական տարբեր նախասիրություններ եւ սկզբունքներ: Բացի այդ, կուսակցություններից ոչ մեկը, ըստ պատգամավորի, չունի պետության կառավարման այլընտրանքային տեսլական:
«Մեծ հաշվով նրանք առաջարկում են նույնը, ինչ որ իշխող կոալիցիան: Սկզբունքային ոչ մի նոր բան», - նշել է Ալեքսանյանը:
Խոսելով եռյակի համատեղ հանրահավաքի մասին` պատգամավորը նշել է. «Ես այս հանրահավաքում այնպիսի հզոր լիցք չեմ տեսնում, որը կհանգեցնի իշխանափոխության»: Ավելին, Ալեքսանյանը նշել է, որ եռյակի ներսում ոչ բոլոր ուժերն են խոսում իշխանափոխության մասին: «Ես, օրինակ, երբեք ԲՀԿ ներկայացուցիչներից, որն ապահովում է ընդդիմության ֆինանսական եւ մարդկային հիմնական ռեսուրսները, չեմ լսել իշխանափոխության անհրաժեշտության վերաբերյալ հայտարարություն»:
Այն հարցին, թե հնարավոր է արդյոք համագործակցություն ՀՀԿ-ի եւ ՀՅԴ-ի միջեւ, որը հրաժարվել է մասնակցել հանրահավաքին` սահմանադրական բարեփոխումների վերաբերյալ տարաձայնությունների պատճառով, Ալեքսանյանը նշել է, դաշնակներին նման առաջարկություն չի արվել եւ չի արվի, քանի որ կուսակցությունները տարբեր հայացքներ ունեն: Ինչ վերաբերում է ՀՅԴ-ի որոշմանը, պատգամավորը նշել է, որ ոչ մի զարմանալի բան չկա, քանի որ կուսակցությունը երկար տարիներ խորհրդարանական կառավարմանը կողմ է հանդես գալիս եւ չի կարող հանկարծ հետ կանգնել իր սկզբունքներից:
Հիշեցնենք, որ երեք քաղաքական երեք ուժերի` ԲՀԿ-ի, ՀԱԿ-ի եւ«Ժառանգության» համատեղ հանրահավաքը տեղի կունենա հոկտեմբերի 10-ին Ազատության հրապարակում: