Չինաստանի Բեյջինգ քաղաքում տեղի է ունեցել Տիեզերական տեխնոլոգիաների վրա հիմնված աղետների կառավարման ՄԱԿ-ի 4-րդ ամենամյա միջազգային գիտաժողովը: Կազմակերպիչներն էին ՄԱԿ-ի տիեզերական հարցերով գրասենյակը (UNOOSA) եւ Չինաստանի Ժողովրդական Հանրապետության քաղաքացիական հարցերով նախարարությունը:
ՀՀ արտակարգ իրավիճակների նախարարությունը գիտաժողովին ներկայացրել է նախարարության «Տեղեկատվական ապահովման եւ ազդարարման կենտրոն» ՓԲԸ տնօրեն Սմբատ Պետրոսյանը:
Գիտաժողովի շրջանակներում պաշտոնական հանդիպում կազմակերպվեց Ս. Պետրոսյանի, Չինաստանի քաղաքացիական պաշտպանության հարցերով նախարարության «Արտակարգ իրավիճակներում ռիկերի նվազեցման» (Ռիսկերի նվազեցման տիեզերերական կենտրոն) ազգային կենտրոնի գլխավոր տնօրեն Պաունգ Չենմինի եւ այլ պաշտոնատար անձանց մասնակցությամբ:
Քննարկվեց երկու նախարարությունների արբանյակային կապի համատեղ համագործակցության տեխնիկական լուծումների հարցը, որը բարձրացվել էր դեռեւս ՀՀ ԱԻ նախարարի Չինաստան կատարած այցի ժամանակ: Չինական կողմին առաջարկվել էր ՀՀ ԱԻՆ ճգնաժամային կառավարման կենտրոնում ստեղծել Ռիսկերի նվազեցման տիեզերական կենտրոն, որին պետք է անվճար հիմունքներով տրամադրվեն չինական HJ-14-A եւ HJ-14-B արբանյակներից ստացվող տվյալները` մշակման, վերլուծության եւ մշտադիտարկման տեխնիկական միջոցների, սարքավորումների եւ ծրագրային փաթեթների ամբողջական փաթեթների ներառմամբ:
Հանդիպման արդյունքում պայմանավորվածություն ձեռքբերվեց, որ ՀՀ ԱԻ նախարարությունը ավելի հստակ ներկայացնի ոլորտային թեմատիկ պահանջները` կենտրոնի բացման հետագա քայլերն իրականացնելու համար:
