Ամերիկյան Apple ընկերությունը հայտարարել է, որ ընդամենը 9 բողոք է ստացել ճկվող iPhone 6-ի վերաբերյալ, գրում է The Financial Times-ը:
Ըստ հրատարակչության՝ սարքը թողարկվել էր նախորդ շաբաթ, եւ այդ օրվանից ցանցում ակտիվ քննարկվում է նոր սարքի հետ կապված խնդիրը: Այս պատմությունն արդեն «bendgate» անվանումն է ստացել (անգլերեն «bend»՝ «ճկվել» բառից եւ gate մասնիկից, որը կիրառության մեջ էր հայտնվել ուոթերգեյթյան սկանդալից հետո), փոխանցում է Gazeta.ru-ն:
«Նորմալ օգտագործելու դեպքում iPhone-ը հազվադեպ է ճկվում, եւ վաճառքի առաջին վեց օրերին ընդամենը 9 գնորդ է կապվել Apple-ի հետ iPhone 6 Plus-ի ծալվելու հարցով», – ասել են ընկերությունում: Նաեւ հիշեցրել են, որ նախքան վաճառքը սարքերը տեխնիկական մանրակրկիտ փորձարկումներ են անցնում, այդ պատճառով iPhone 6-ն ու iPhone 6 Plus-ը համապատասխանում են Apple-ի բոլոր պահանջներին:
