ՄԱԿ-ի Զարգացման ծրագրի ադմինիստրատոր (UNDP Administrator) Հելեն Քլարկը` Հարավային Կովկաս տարածաշրջանային այցի շրջանակներում, սեպտեմբերի 28-ին եռօրյա պաշտոնական այցով կժամանի Հայաստան:
Այցի ընթացքում տիկին Քլարկը` ՄԱԶԾ ադմինիստրատորի օգնական, ՄԱԶԾ Եվրոպայի եւ ԱՊՀ երկրների տարածաշրջանային բյուրոյի տնօրեն տիկին Ջիհան Սուլթանօղլուի եւ Հայաստանում ՄԱԶԾ մշտական ներկայացուցիչ պարոն Բրեդլի Բուզետտոյի հետ, կհանդիպի ՀՀ նախագահ Սերժ Սարգսյանին, ՀՀ վարչապետ Հովիկ Աբրահամյանին, ՀՀ արտգործնախարար Էդվարդ Նալբանդյանին, քաղաքացիական հասարակության, միջազգային հանրության ներկայացուցիչներին, ինչպես նաեւ կին առաջնորդներին՝ քննարկելու Հայաստանի զարգացման հիմնական ձեռքբերումներն ու մարտահրավերները, երկրի առաջնահերթությունները, համագործակցության հեռանկարներն՝ ուղղված կայուն մարդկային զարգացման առավել ամրապնդմանը Հայաստանում:
Նշենք, որ Հելեն Քլարկն նշանակվել է ՄԱԿ-ի Զարգացման ծրագրի ադմինիստրատոր 2009թ. ապրիլին եւ հանդիսանում է կազմակերպության առաջին կին ղեկավարը: Նա նաեւ գլխավորում է ՄԱԿ-ի Զարգացման խումբը՝ հանձնաժողով, որը բաղկացած է զարգացման հարցերին առնչվող ՄԱԿ-ի բոլոր հիմնադրամների, ծրագրերի եւ գերատեսչությունների ղեկավարներից:
Մինչ այդ նա երեք ժամկետ անընդմեջ եղել է Նոր Զելանդիայի վարչապետ: Սա Հելեն Քլարկի առաջին այցն է Հայաստան: