Թբիլիսիում ցուցահանդես է անցկացվել, որը նվիրված է եղել Օսմանյան Թուրքիայում եւ ժամանակակից Իրաքում եզդիների ցեղասպանությանը: Հենց այս թեման գլխավորն է դարձել վրացական մայրաքաղաքում Քրդական մշակույթի ամենամյա օրերի շրջանակներում:
Ցուցահանդեսին ներկայացվել են նյութեր Վրաստանի ազգային արխիվից 1915-18թթ.-ին Օսմանյան Թուրքիայում եզդիների կոտորածի մասին: Զուգահեռ ցուցադրվել են նոր լուսանկարներ, որոնցում պատկերված են «Իրաքի եւ Շամի իսլամական պետություն» խմբավորման գրոհայիններից երկրի հյուսիս-արեւմուտքում Սանջար լեռան վրա թաքնվող եզդի-փախստականներ իրաքյան Նայնավա նահանգից»:
«Փախստականների լուսանկարները, որոնք դուք տեսնում եք ցուցահանդեսում, «Rudaw» լրատվական գործակալության թղթակցի համարձակության արդյունքն է, ով փախստականների հետ միասին շրջափակման մեջ էր հայտնվել եւ 5 օր անցկացրել է լեռան վրա առանց հաց ու ջրի»,- NEWS.am-ի թղթակցի հետ զրույցում հայտարարեց Վրաստանում քուրդ երիտասարդների միության նախագահ Լենա Խուդոյանը: «Սինջարի եզդիների ողբերգության մասին արդեն ամբողջ աշխարհը գիտի, արձագանքել են նաեւ Հայաստանում, այդ թվում մեր հայրենակիցների կողմից: Սակայն այդ հումանիտար ողբերգության մասին հարկավոր է մշտապես խոսել: Մենք ցանկանում ենք, որպեսզի բոլորն իմանան, ինչու են մեր տոհմակիցները ստիպված փախչել իրենց տներից ու ապաստան գտնել հայրենիքից հեռու»,- հավելել է նա:
Ցուցահանդեսին ներկայացվել են մոտ 100 տարվա պատմություն ունեցող նյութեր, այդ թվում նաեւ եզդիների իրավիճակի մասին զեկույց, որոնք Օսմանյան կայսրության ժողովուրդների ցեղասպանության տարիներին փախչում էին Ցարական Ռուսաստանի Թիֆլիսի ու Երեւանի նահանգներ: Մյուս ցուցանմուշների թվում էին 19-րդ դարի Արեւելյան Անատոլիայի քարտեզները, որտեղ նշված էին քրդերի բնակության վայրերը: Ցուցահանդեսի կենտրոնական վայրերից մեկում ցուցադրված է Վանա լճին մոտակա Հոշաբ ամրոցի նմուշը, որը կառուցել են քուրդ ֆեոդալները 17-րդ դարում:
Այն հարցին, թե արդյոք Վրաստանի հայկական համայնքն առաջարկել է համատեղ ցուցահանդես անցկացնել Հայոց ցեղասպանության 100-ամյակի նախօրեին, Խուդոյանը պատասխանել է. որ նախագծին մեծ պատասխանատվությամբ կմոտենար: «Մեր ժողովուրդները միասին մեծ ողբերգություն են ապրել եւ պահպանել են միմյանց հետ կապը: Մեզ մոտ պահպանվում են եզդիների մասին պատմություններ, որոնք թաքցրել են ու փրկել հայերին կոտորածների ժամանակ, նման պատմություններ պահպանվել են նաեւ հայերի մոտ: Կարծում եմ, միասին պատմելու նյութ ունենք»,- հավելել է նա: