Ուկրաինայում հրադադարի ռեժիմի պահպանման շուրջ իրավիճակը հեռախոսազրույցում քննարկել են այդ երկրի նախագահ Պյոտր Պորոշենկոն եւ Գերմանիայի կանցլեր Անգելա Մերկելը: Պորոշենկոյի կայքի փոխանցմամբ՝ Ուկրաինայի նախագահն ընդգծել է, որ սպասում է Մինսկի արձանագրությունների շրջանակում ռուսական կողմի պարտավորությունների իրականացմանը. զորքերի դուրսբերում, սահմանի փակում եւ անվտանգության գոտու անցկացնում:
Զրուցակիցները քննարկել են նաեւ ԵԱՀԿ-ի կողմից դիտարկման եւ երկկողմ հրադադարի ռեժիմի պահպանման ստուգման գործառույթների իրականացման վիճակը: Այդ համատեքստում Պորոշենկոն անհանգստություն է հայտնել, որ ԵԱՀԿ-ն մինչեւ հիմա անօդաչու թռչող սարքեր չի տրամադրել, որը նախատեսվում է նախնական պայմանավորվածությամբ:
«Պյոտր Պորոշենկոն շնորհակալություն է հայտնել Անգելա Մերկելին՝ Գերմանիայի կողմից մարդասիրական նախաձեռնություները շարունակելու համար, որոնց շուրջ պայմանավորվածություն էր ձեռք բերվել Կիեւ կանցլերի այցի ժամանակ: Մասնավորապես, Գերմանիան 25 մլն եվրո է տրամադրում՝ հարկադիր տեղահանվածների համար բնակարաններ կառուցելու եւ 500 մլն եվրո վարկային երաշխիքներ՝ Դոնբասի ենթակառուցվածքները վերականգնելու նպատակով»,- նշվում է հաղորդագրությունում:
Անգելա Մերկելն ու Պյոտր Պորոշենկոն նաեւ քննարկել են էներգետիկ հարցեր, մասնավորապես՝ գազի շուրջ վերջին եռակողմ խորհրդակցությունների արդյունքները:
