Կաշառք ստանալու պահին ձերբակալված Խ. Աբովյանի անվան հայկական պետական մանկավարժական համալսարանի հեռակա ուսուցման ընդունելության պատասխանատու քարտուղար Մկրտիչ Սարգսի Ղուկասյանի նկատմամբ ստորագրություն քաղաքից չբացակայելու մասին խափանման միջոցը ընտրելը պայմանավորված է նրա տարիքով եւ առողջական խնդիրներով: Այս մասին NEWS.am-ի թղթակցին հայտնեցին մանկավարժական համալսարանի լրատվական ծառայությունից:
Մկրտիչ Ղուկասյանը 68 տարեկան է, նա դեռ Մանկավարժական համալսարանի աշխատակից է: «Եթե քննիչը ուղարկեր գրություն, որ կասեցվի իր պաշտոնավարումը, պարտավոր էինք կասեցնել, բայց նման գրություն չի եկել: Նա դեռ համարվում է Մանկավարժական համալսարանի աշխատակից, պարզապես աշխատանքի չի գալիս»,-հայտնեցին համալսարանից:
Ավելի վաղ NEWS.am-ը հայտնել էր, որ ՀՀ Ազգային անվտանգության ծառայության կողմից ձեռնարկված օպերատիվ-հետախուզական միջոցառումների արդյունքում՝ սեպտեմբերի 25-ին, կաշառք ստանալու պահին ձերբակալվել է Խ. Աբովյանի անվան հայկական պետական մանկավարժական համալսարանի հեռակա ուսուցման ընդունելության պատասխանատու քարտուղար Մկրտիչ Սարգսի Ղուկասյանը:
ՀՀ ԱԱԾ Մամուլի կենտրոնից հայտնում են, թե Մկրտիչ Ղուկասյանը Երեւան քաղաքի բնակչուհի Ց. Հովհաննիսյանին նույն համալսարանում հեռակա ուսուցմամբ ընդունվելու հարցը դրական լուծելու դիմաց՝ վերջինիցս պահանջել եւ ստացել է 1.700 ԱՄՆ դոլար կաշառք:
Դեպքի առթիվ ՀՀ ԱԱԾ Քննչական վարչությունում հարուցվել է քրեական գործ՝ ՀՀ Քրեական օրենսգրքի 311/1 հոդվածի 3-րդ մասի 2-րդ կետի հատկանիշներով: Կատարվում է նախաքննություն: