Անգլիայի Bear Grill սրճարանում 8 հազար կալորիականությամբ նախաճաշ են առաջարկում, փոխանցում է Lenta.ru-ն: Աշխարհի ամենակալորիական նախաճաշը համտեսել ցանկացողները ինքնազգացողության հետ կապված հնարավոր խնդիրների դեպքում բողոքներ չներկայացնելու պարտավորագիր կստորագրեն:
«Քնեցնող» անվանումը ստացած ուտեստը ներառում է չորս ձվի ձվածեղ, 8 շերտ բեկոն, 8 նրբերշիկ, 8 կարտոֆիլի կոտլետ, պանրով օմլետ չորս ձվից, չորս վաֆլի, չորս տապակած հացի կտոր, սեւ պուդինգի չորս շերտ: Նախաճաշի մեջ մտնում են նաեւ հատիկավորներ, լոլիկ, սունկ, կարտոֆիլ ֆրի: Նախաճաշի հետ կարելի է խմել լիտրանոց կաթնային կոկտեյլ:
20 այցելուներ, ըստ հրատարակչության, արդեն փորձել են ֆիրմային նախաճաշը, սակայն ոչ ոք մինչեւ վերջ չի կարողացել ուտել: Հսկայական նախաճաշը արժե 19,95 ֆունտ ստեռլինգ (32 դոլար): Սրճարանում նաեւ այս նախաճաշի փոքր տարբերակն է մշակվել՝ երեխաների համար:
Անգլիական նախաճաշը սովորաբար բաղկացած է լինում յոթ տեսակի տապակած մթերքներից՝ նրբերշիկ կամ սարդելկա, ձվածեղ, բեկոն, հատիկավորներ տոմատի սոուսում, շամպինիոն սնկեր, լոլիկ եւ հացի կտորներ: Ազգային նախաճաշի կալորիականությունը պատմական պատճառներով է բացատրվում: Նախաճաշը պատրաստում էին բրիտանացի բանվորների ընտանիքներում, որոնք օրվա ընթացքում հնարավորություն չունեին սնվելու, եւ կալորիաները պետք է բավականացնեին մինչեւ երեկոյան ժամը ութը: