Ամեն բան հակահայկական ակցիայի վերածելու ոգուն հավատարիմ Ադրբեջանի իշխանությունները Ժնեւում Փախստականների հարցերով ՄԱԿ-ի Բարձրագույն հանձնաժողովի գործադիր կոմիտեի 65-րդ նստաշրջանի ժամանակ փորձել են հերթական շոուն ցուցադրել:
APA գործակալության փոխանցմամբ՝ միջոցառմանը ելույթ ունեցող Ադրբեջանի փոխվարչապետ Ալի Հասանովը, ով նաեւ փախստականների եւ հարկադիր տեղահանվածների հարցերով պետկոմիտեի նախագահն է, խոսել է փախստականների խնդրի մասին եւ իսկույն անցում կատարել ղարաբաղյան հակամարտությանը, «օկուպացիային», փախստականներին եւ այլնին:
Ադրբեջանական պետպաշտոնյանների ելույթներն արդեն վաղուց հիշեցնում են հին անեկդոտը, որտեղ ուսանողը կենսաբանության քննություն է հանձնում. «Իսկ ահա, եթե ձուկը ունենար մորթի, ապա այնտեղ կբազմանային ոջիլներ»:
Այդ անգամ Հասանովը ավելի առաջ է գնացել: Այս պաշտոնյան թախծոտ հայացքով փորձել է բռնված դիվերսիոն-հետախուզական անդամներին ներկայացնել որպես «տատիկի գերեզմանին այցելության եկած դժբախտ տեղահանվածներ»: Հոգ չէ, որ նրանք հատուկ դաժանությամբ սպանել են անչափահաս պատանուն:
Սակայն ելույթի գագաթնակետը երրորդ դիվերսանտի՝ իր անվանակցի մարմինը «անհապաղ վերադարձնելու» պահանջն էր:
Եվ իհարկե, ադրբեջանցի պետպաշտոնյան ոչ մի խոսքով անդրադարձ չի կատարել ադրբեջանական բանտերում հայ գերիների սպանություններին, կտտանքներին եւ անմարդկային վերաբերմունքին:
