Եվրասիական միություն Հայաստանի չմտնելու դեպքում կարող են խնդիրներ ծագել Ռուսաստանի հետ երկկողմ հարաբերություններում՝ բոլոր ձերաչափերով, առավել եւս՝ հետխորհրդային տարածքում տեղի ունեցող գործընթացների ֆոնին: Այս մասին հոկտեմբերի 1-ի մամուլի ասուլիսում հայտարարել է Կովկասի ինստիտուտի փոխտնօրեն, քաղաքագետ Սերգեյ Մինասյանը:
Փորձագիտական շրջանակներում, ըստ քաղաքագետի, բավական լուրջ կասկածներ կան՝ կհասնի ԵՏՄ-ն այն նպատակներին, որոնց մասին խոսվում է: «Բայց դա կարեւոր չէ: Իրականում Հայաստանի համար ԵՏՄ մտնելը պայմանավորված է անվտանգության նկատառումներով: Եթե Ռուսաստանը ցանկանում է եւ պատրաստ է իր վրա վերցնել այդ ձեւաչափի նյութական եւ քաղաքական ծախսերը, ապա Հայաստանը կարող է միանալ դրան», - նշել է Մինասյանը:
Հանգամանքը, որ Հայաստանն ընդհանուր մաքսային սահման չունի միության հետ, արդեն լուրջ խնդիր է ԵՏՄ-ին Հայաստանի անդամակցության տնտեսական նպատակահարմարության տեսանկյունից:
«Մյուս կողմից, քաղաքական հանգամանքներն այս հարցում ավելի կարեւոր են: Միանգամայն հնարավոր է նաեւ, որ այս ձեւաչափը լինի ձեւական եւ Հայաստանի համար խնդիրներ չառաջացնի», - տեսակետ է արտահայտել քաղաքագետը: Ի պատասխան հարցին, թե արդյոք Հայաստանը կշահի տնտեսական տեսանկյունից, Սերգեյ Մինասյանը նշել է. «Միայն այն հանգամանքը, որ Հայաստանի անդամակցությունը դառնում է հնարավոր, երբ բացառություններ են արվում շուրջ 1000 ապրանքների մաքսազերծման հարցում, արդեն վկայում է, թե դա որքան նպատակահարմար է Հայաստանի համար»:
Նա նաեւ հիշեցրել է, որ էներգակիրների գնի հարցում Հայաստանն արդեն բավական բարենպաստ պայմաններ է ստացել Ռուսաստանի կողմից:
