«Վերնիսաժում» մայիսի 17-ին հնչած կրակոցների գործով նախաքննությունը մոտ օրերս կավարտվի: Այս մասին NEWS.am-ի հետ զրույցում ասաց գործով կալանավորված Ներսես Մելքոնյանի փաստաբան Վարդուհի Էլբակյանը:
«Հոկտեմբերի 1-ին դատարանը բավարարեց քննիչի միջնորդությունը՝ իմ պաշտպանյալի կալանքը եւս 2 ամսով երկարացնելու վերաբերյալ: Հիմնավորումն այն է, որ նախաքննության ավարտ է հայտարարվելու, գործի նյութերին պետք է ծանոթանալ: Իմ նախնական պայմանավորվածությամբ՝ նախաքննությունն առաջիկա օրերին ավարտվելու է, եթե իհարկե, ինչ որ բան չփոխվի»,- ասաց փաստաբանը:
Նշենք, որ հոկտեմբերի 1-ին երկու նոր մեղադրանք է առաջադրվել Ներսեսի եւ եւս 4 անձի վրա կրակած Գոռ Առաքելյանին:
Հիշեցնենք, որ ըստ նախնական վարկածի՝ Ներսես Մելքոնյանն ու նրա ընկեր Վալերի Հովհաննիսյանը մայիսի 17-ին՝ ժամը 13:30-ի սահմանում, «Վերնիսաժի» մոտ վեճի են բռնվել Գոռ Առաքելյանի հետ եւ բռնություն կիրառել նրա նկատմամբ, հնչել են կրակոցներ, 5 մարդ վիրավորվել էր, այդ թվում՝ Ներսես Մելքոնյանն ու նրա ընկեր Վալերի Հովհաննիսյանը, նաեւ պատահական անցորդներ: ԱԺ ԲՀԿ-ական պատգամավոր Կարո Կարապետյանի փեսան՝ Գոռ Առաքելյանը, մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու, ինչպես նաեւ երկու եւ ավել անձանց առողջությանը ծանր, մեկ անձի՝ միջին ծանրության վնաս պատճառելու համար, իսկ խափանման միջոց է ընտրվել կալանավորումը։ Հունիսի 9-ին կալանավորվել էր նաեւ Ներսես Մելքոնյանը, նրան մեղադրանք է առաջադրվել խուլիգանություն կատարելու համար: Նույն մեղադրանքով կալանավորվել է նաեւ Վալերի Հովհաննիսյանը։