«Շրջանառության հարկի մասին» նոր օրենքի դեմ բողոքող՝ մայրաքաղաքի տոնավաճառների մի քանի հարյուր առեւտարականներ այսօր՝ հոկտեմբերի 2-ին, վաղ առավոտյան նորից հավաքվել են կառավարության շենքի առջեւ՝ պահանջելու օրենքի կասեցում:

NEWS.am-ի թղթակիցը հաղորդում է, որ առեւտրականները վանկարկում են «կասեցում», «վարչապետ»՝ պահանջելով օրենքը փոխել՝ շրջանառության մասին հաշվետվության ներկայացումը դարձնելով ընտրովի։ Կառավարության մոտ են նաեւ մեծ թվով ոստիկաններ՝ Երեւանի փոխոստիկանապետ Վալերի Օսիպյանի գլխավորությամբ:

«Լավ է, որ վարչապետը մեկ տոկոս է դարձրել հարկը, սակայն համաձայն կլինենք, եթե հանվի փաստաթղթավորման պահանջը»,- ասաց առեւտրական Գագիկ Ալավերդյանը:

Փոքր ձեռներեցությամբ զբաղվողների հայկական միության նախագահ Ստեփան Ասլանյանն էլ NEWS.am-ի հետ զրույցում ասաց, որ առեւտրականները մտադիր են համընդհանուր գործադուլ սկսել, բայց առայժմ սպասում են, որ կառավարությունը ինչ-որ բան փոխի:

Առեւտրականներն ասում են, որ իրենց վրդովեցրել է վարչապետ Հովիկ Աբրահամյանի՝ հոկտեմբերի 1-ի ելույթն ԱԺ-ում, երբ նա ընդդիմադիր պատգամավորներին դիմելով՝ հարցրել էր. «Ի՞նչ է, երկրորդ Մարտի 1 ե՞ք ուզում»:

«Եթե օրենքում այսօր փոփոխություններ չլինեն, մենք Մարտի 1 ենք անելու»,- ասում են նրանք:

Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։