Հայաստանի նախագահ Սերժ Սարգսյանն այսօր՝ հոկտեմբերի 13-ին, ընդունել է Երեւանում անցկացվող ԱՊՀ անդամ պետությունների միգրացիոն մարմինների ղեկավարների խորհրդի 16-րդ նիստի մասնակիցների պատվիրակությանը՝ խորհրդի նախագահ, ՌԴ դաշնային միգրացիոն ծառայության ղեկավար Կոնստանտին Ռոմոդանովսկիի գլխավորությամբ:
Նախագահը ողջունել է նիստի անցկացումը Երեւանում՝ մաղթելով ԱՊՀ անդամ պետությունների միգրացիոն մարմինների ղեկավարների խորհրդին հաջողություններ: Սերժ Սարգսյանը կարեւորել է միգրացիայի ոլորտում համագործակցությունը եւ հույս հայտնել, որ երեւանյան նիստում ընդունվելիք որոշումները դրական ազդեցություն կունենան ԱՊՀ տարածքում միգրացիոն գործընթացների կանոնակարգման տեսանկյունից: Նա ընդգծել է, որ միգրացիայով պայմանավորված խնդիրների լուծմանը երկրները միասին ավելիին կարող են հասնել:
Զրուցակիցները համակարծիք են եղել, որ միգրացիան բազմաթիվ գործոններով պայմանավորված բարդ երեւույթ է, որի կանոնակարգումն ու կառավարումը որոշակի մասնագիտական գիտելիքներ պահանջող գիտություն է:
Կոնստանտին Ռոմոդանովսկին վստահեցրել է, որ խորհուրդն արդեն երկար տարիներ բաց եւ անկեղծ երկխոսության մթնոլորտում մասնագիտական արդյունավետ աշխատանք է իրականացնում՝ սերտ կապեր պահպանելով նաեւ Հայաստանի համապատասխան գերատեսչությունների հետ: Նա Հանրապետության նախագահին ներկայացրել է խորհրդի գործունեությունն ու հերթական` 16-րդ նիստի օրակարգային հարցերը, ընդգծելով, որ խորհրդի աշխատանքը նպատակաուղղված է միգրացիոն քաղաքականության ոլորտում փոխգործակցության համակարգմանը եւ առկա խնդիրների լուծմանը, մարդկանց համար ժամանման երկրում աշխատանքի եւ կեցության արժանապատիվ պայմանների ապահովմանը:
Կոնստանտին Ռոմոդանովսկին գոհունակությամբ է նշել, որ Հայաստանը միացել է ԱՊՀ շրջանակում գործող՝ միգրացիոն ոլորտին վերաբերող բոլոր փաստաթղթերին եւ ինտեգրացիոն գործընթացներում շահագրգիռ ու կառուցողական մասնակցություն ունի: