Իսպանացի հանրահայտ օպերային երգչուհի, ՄԱԿ-ի խաղաղության դեսպան Մոնսերատ Կաբալիեն արցախյան առաջին այցից հետո ՄԱԿ-ում իր տպավորություններն ու կարծիքն է ներկայացրել Արցախի ու նրա բնակչության մասին։
«Արցախպրես»-ի հաղորդմամբ՝ այդ մասին այսօր Ստեփանակերտի «Վալեքս Գարդեն» հյուրանոցի կոնֆերանս-սրահում հրավիրած մամլո ասուլիսում նշել է ԼՂՀ մշակույթի եւ երիտասարդության հարցերի նախարար Նարինե Աղաբալյանը: Նախարարի խոսքով՝ Ադրբեջանն իր տխրահռչակ «սեւ ցուցակ»-ով ցանկանում է արգելել հեղինակավոր անձանց այցելություններն Արցախ, քանի որ մտավախություն ունի, որ հակառակ դեպքում միջազգային հանրության համար կբացահայտվի իր տարածած ապատեղեկատվությունը, ինչպես նաեւ հայտնի կդառնա Արցախի ու նրա հիմնախնդրի մասին ողջ ճշմարտությունը։
Սակայն տիկին Կաբալիեն իր երկրորդ այցելությամբ, այս անգամ՝ ընտանյոք հանդերձ, ապացուցեց, որ ճշմարիտ ու սկզբունքային արվեստագետը վեր է ամենայն քաղաքական նկրտումներից։
