Հայոց ողբերգության 100-ամյա տարելիցի շեմին աշխարհը պետք է միավորվի միջէթնիկական եւ կրոնական հակամարտության ցանկացած դրսեւորման դեմ: Այդ մասին NEWS.am-ի թղթակցի հետ զրույցում հայտնել է Լոս Անջելեսում Հայաստանի գլխավոր հյուպատոս Սերգեյ Սարկիսովը:
Հարցին, թե վերջին շրջանում ի՞նչ է հաջողվել անել հատկապես Կալիֆորնիայի նահանգային խորհրդարանի կողմից ԼՂՀ անկախության ճանաչման բանաձեւի ընդունումից հետո, գլխավոր հյուպատոսը պատասխանել է. «Անցած ամիսները համընկան ամառային հանգստի հետ եւ, չնայած դրան, նույնիսկ մեծապես դրա շնորհիվ ( մինչ մենք աշխատանք էինք իրականացնում, մեր քաղաքական ընդդիմադիրները հանգստանում էին), մեզ հաջողվեց լիովին ավարտել Կալիֆորնիայի կողմից Արցախի ճանաչման գործընթացը: Օգոստոսին աշխարհի 8-րդ տնտեսությունն ունեցող նահանգի սենատը միաձայն հաստատեց բանաձեւը: Այդ աննախադեպ իրադարձությունը մեր Սփյուռքի եւ դիվանագետների համակարգված աշխատանքի արդյունքն էր»:
Սարկիսովի խոսքով, հաջորդ տարին յուրահատուկ է ամբողջ աշխարհի հայերի համար: «Դուք չեք գտնի ոչ մի հայ ընտանիք, որն այս կամ այն կերպ չի տուժել ցեղասպանությունից: Այդ սարսափելի ողբերգության 100-րդ տարելիցը հատուկ տարեթիվ է: Այստեղ՝ Կալիֆորնիայում, մենք կփորձենք Միացյալ Նահանգների ժողովրդին պատմել այդ ամենի մասին: Հնարավոր չէ պատմությունը հետ շրջել, բայց մենք պարտավոր ենք այնպես անել, որ մարդկության դեմ սարսափելի հանցագործություններն այլեւս երբեք չկրկնվեն ո՛չ Հայաստանում, ո՛չ Ղարաբաղում եւ ո՛չ էլ աշխարհի որեւիցե այլ վայրում: Ցավոք, մենք մշտապես ապրում ենք վտանգի մթնոլորտում»,- նշել է հյուպատոսն ու հավելել. «Հայոց ողբերգության 100-ամյա տարելիցի շեմին աշխարհը պետք է միավորվի միջէթնիկական եւ կրոնական հակամարտության ցանկացած դրսեւորման դեմ: Միացյալ Նահանգները մեծ պետություն է, եւ Միացյալ Նահանգների ժողովուրդը հրաշալի ժողովուրդ է, ովքեր ժամանակին ապաստան են տվել ցեղասպանությունից մազապուրծ եղածներին: Մեր խնդիրն է հիշեցնել Միացյալ Նահանգներին եւ ամբողջ աշխարհին, որ նման զարհուրելի ողբերգության կրկնությունը անխուսափելի է, եթե պատմությունից ճիշտ դասեր չեն քաղվում»: