Երեւանում այսօր՝ հոկտեմբերի 16-ին, մեկնարկած Միջազգային կոմունիկացիոն երկօրյա բիենալեին ներկայացվել է 320 աշխատանք մոտ երկու տասնյակ երկրներից, որոնց 10 տոկոսը Հայաստանից են:
«Սա բավականին մեծ թիվ է, քանի որ աշխատանքեր կան Ռուսաստանից, Ղազախստանից, Ուկրաինայից, Գերմանիայից, Ֆրանսիայից, Լեհաստանից եւ այլ երկրներից: Բիենալեին հրավիրվել են նաեւ այլ փառատոների հաղթող աշխատանքներ, այդ պատճառով մեզ թեժ պայքար է սպասում: Ամենակարեւորը, որ հայաստանցի ստեղծագործողը պայքարի, մրցակցի աշխարհի ստեղծագործողների հետ, իր աշխատանքների թերությունները նկատի, առավելությունները զգա»,- լրագրողներին ասաց բիենալեի նախագահ Արմեն Մարտիրոսյանը:
Միջազգային կոմունիկացիոն բիենալեն կտեւի մինչեւ հոկտեմբերի 18-ը, աշխատանքները կմրցեն ինը անվանակարգերում: Ինչպես նշեց Արմեն Մարտիրոսյանը՝ յուրաքանչյուր անվանակարգում կտրվի մրցանակ լավագույն աշխատանքի համար, կշնորհվի նաեւ բիենալեի գրան պրի: Ենթաանվանակարգերում մրցող աշխատանքները ժյուրիի որոշմամբ կարժանան առաջին, երկրորդ եւ երրորդ մրցանակների:
Բիենալիեի ընթացքում մինչեւ հոկտեմբերի 18-ը վարպետաց դասեր կանցկացվեն Հայ-ռուսական (Սլավոնական) համալսարանում:
Նշենք, որ բիենալեի հիմնական անվանակարգերն են՝ հեռուստատեսային և վիդեո գովազդ, տպագիր և արտաքին գովազդ, թվային և նոր մեդիա, ռադիո գովազդ, գրաֆիկ դիզայն, մարքեթինգային արշավներ, ՓիԱռ արշավներ, գիրք, սոցիալական գովազդ:
