Հայաստանի ասորական համայնքը դժգոհ է ասորական ցեղասպանության վերաբերյալ Հայաստանի վերաբերմունքից, որը մինչեւ այսօր չի ճանաչել այն: Այս մասին այսօր՝ հոկտեմբերի 16-ին, լրագրողների հետ զրույցում ասաց Հայաստանի ասորական ֆեդերացիայի նախագահ Իրինա Գասպարյանը՝ նշելով, որ միջազգային քաղաքականության զարգացումների ֆոնի վրա հարցը 2-րդ պլան է մղվել, իր տեղը զիջել ԵՄ եւ ՄՄ ինտեգրացիոն գործընթացներին:
«Մեր համայնքը կողմնակից է ՄՄ ինտեգրվելու՝ Հայաստանի որոշմանը: Ասորիները միշտ իրենց ցեղասպանության հարցը բարձրացրել են Հայոց ցեղասպանության հարցի հետ, մինչդեռ Հայոց ցեղասպանության հարցը բարձրացնելիս՝ հայերը անտեսում են ասորիների ցեղասպանությունը: Այն երկներում, որտեղ ճանաչվել է Հայոց ցեղասպանությունը, պետք է վերանայվի նաեւ ասորիների եւ հույների ցեղասպանության հարցը»,-ասաց Իրինա Գասպարյանը:
Ինչպես նշեց Իրինա Գասպարյանը՝ հաջորդ տարի իրենք միջազգայնորեն կբարձրացնեն ասորիների ցեղասպանության հարցը, համապատասխան օրինագիծ կներկայացնեն ԱԺ:
Ասորական ֆեդերացիայի նախագահը նշեց, որ արդեն մի քանի երկիր ճանաչել են ասորիների ցեղասպանությունը:
«2010 Շվեդիայի պառլամենտը ճանաչեց ասորիների ցեղասպանությունը հայ-հույն-ասորական համատեղ բանաձեւի շրջանակներում: Նախաձեռնողները հենց ասորիներն են եղել: Շվեդիայի պառլամենտի 5 ասորի պատգամավորներ նախաձեռնեցին այդ բանաձեւը եւ նպաստեցին ճանաչման գործընթացին»,-ասաց Իրինա Գասպարյանը՝ նշելով, որ իրենց ազգի հանդեպ կատարված ցեղասպանությունը ճանաչել են նաեւ Մեծ Բրիտանիայի համայնքների պալատը, Ավստրալիան եւ ԱՄՆ մի քանի նահանգներ:
