Հայաստանն ու Ադրբեջանը Ռուսաստանի, Բելառուսի եւ Ղազախստանի համար սոսկ գործիք են միմյանց քաղաքականությունից դժգոհություն հայտնելու համար: Այս մասին հոկտեմբերի 16-ի մամուլի ասուլիսում հայտարարել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Անդրադառնալով Ադրբեջանի՝ ԵՏՄ-ին անդամակցելու հավանականությանը, քաղաքագետն ընդգծել է. «Նախ, Ադրբեջանը չունի եւ երբեք չի ունեցել նման մտադրություն, երկրորդ, նրան ոչ մեկը դա լրջությամբ չի առաջարկել, երրորդ, ոչ մի օրակարգում այդ հարցը չկա: Չորրորդ, հունվարի սկզբից ԵՏՄ անդամ կդառնա Հայաստանը: Եւվհինգերորդ, հավանաբար, ամենագլխավորը, գոյություն ունի Մինսկ-Աստանա-Մոսկվա հարաբերությունների ձեւաչափը, այդ ձեւաչափում օգտագործվում են տարբեր պատրվակներ, որպեսզի ցույց տան իրենց դժգոհությունը միմյանց քաղաքականությունից»: Հայաստանն ու Ադրբեջանը, ըստ քաղաքագետի, դրանցից մեկն են: «Իրական ԼՂՀ-ի, Հայաստանի եւ Ադրբեջանի հետ դա գրեթե ոչ մի կապ չունի», - ընդգծել է Ալեքսանդր Իսկանդարյանը:
