Սահմանամերձ բնակավայրերի բնակիչների համար ԲՀԿ-ի առաջարկած արտոնությունները մի շարք ռիսկեր են պարունակում: Այս մասին ասված է ԲՀԿ-ական պատգամավորներ Նաիրա Զոհրաբյանի եւ Միքայել Մելքումյանի կազմած օրինագծերի փաթեթի վերաբերյալ կառավարության եզրակացությունում:
Մասնավորապես, պատգամավորներն առաջարկել էին սահմանամերձ շրջաններում փոքր բիզնեսի համար սահմանել զրոյական լիցենզիոն վճար:
Կառավարության հիմնավորման մեջ նշվում է, որ այս արտոնության հասցեականությանը հետեւելը բարդ է. բիզնեսը կարելի է գրանցել սահմանամերձ շրջանում, իսկ աշխատեցնել մեկ այլ վայրում: Սահմանամերձ բնակավայրերի հողահարկն ու գույքահարկը պետբյուջեի միջոցներով սուբսիդավորելու վերաբերյալ պատգամավորների առաջարկների մասով ֆինանսների նախարարությունն առաջարկել է արտոնությունը տարածել տվյալ բնակավայրերի սահմաններում ունեցած հողի գույքի հարկի վրա:
Միեւնույն ժամանակ ֆինանսների նախարարությունն օրինագիծը համարում է ընդունելի եւ ԲՀԿ-ին առաջարկում է համատեղել ջանքերը կառավարության հետ, որը նույնպես օրինագծերի փաթեթ է մշակում սահմանամերձ շրջաններին աջակցություն ցուցաբերելու հարցով:
