Եվրասիական տնտեսական միությանն անդամակցելուց հետո Հայաստանում գնաճ կսկսվի, եւ դա երկու պատճառ ունի: Այս մասին հոկտեմբերի 17-ի մամուլի ասուլիսի ժամանակ հայտարարել է ԱԺ արտաքին հարաբերությունների մշտական հանձնաժողովի նախագահ Հովհաննես Իգիթյանը:
Նա բացատրել է, որ առաջին հերթին ԵՏՄ-ին միանալով Հայաստանը խախտում է ունեցած միջազգային բոլոր պայմանավորվածությունները, ինչպես երկկողմ, այնպես էլ ԱՀԿ-ի, Համաշխարհային բանկի, ԱՄՀ-ի շրջանակում: «Բացի դրանից, ոչ ոք, նույնիսկ կառավարության անդամները, չեն թաքցնում, որ Ռուսաստանի նկատմամբ կիրառվող պատժամիջոցները ազդել են նաեւ Հայաստանի վրա: Ռուսական բանկերի եւ խոշոր կազմակերպությունների նկատմամբ կիրառված պատժամիջոցները Ռուսաստանին զրկում են «էժանագին» փողերից: Նշանակում է, որ փողը թանկանում է, իսկ նշված բանկերը Հայաստանում մասնաճյուղեր ունեն: Բացի այդ, ներդրումային ծրագրերը, որոնք Ռուսաստանը խոստացել է իրականացնել այս կամ այն գործարանը կամ էներգետիկ համակարգը ստանալու դեպքում, հազիվ թե իրականացվեն պատշաճ կերպով», - նշել է Հովհաննես Իգիթյանը:
