Ցեղասպանության 100-ամյա տարելիցին՝ 2015 թ. ապրիլի 24-ին, գործող իշխանություններին հեռացնելու իր ծրագրի մասին քաղաքացիներին իրազեկելու նպատակով հոկտեմբերի 19-ից «Նախախորհրդարանը» ավտոերթեր կանցկացնի հանրապետության ամբողջ տարածքում։ Այսօր՝ հոկտեմբերի 17-ին, այդ մասին լրագրողների հետ հանդիպմանն ասաց «Նախախորհրդարանի» մամուլի խոսնակ եւ Հիմնադիր խորհրդարանի պատգամավորության թեկնածու Վարուժան Ավետիսյանը:
«Ապրիլի 24-ից մենք հեռացնելու ենք ռեժիմին, ոտքի ենք հանելու մեր ժողովրդին, եւ սկսվելու է արմատական քաղաքական փոփոխությունների գործընթացը: Այս գործընթացը ավարտին հասցնելու համար մենք կարիք ունենք իրազեկելու եւ դրա միջոցով մոբիլիզացնելու մեր ժողովրդին, որպեսզի կարողանանք մեր երկիրը դուրս բերենք այս իրավիճակից»,- ասաց Վարուժան Ավետիսյանը:
«Նախախորհրդարանն» իր ծրագրի իրականացման համար ընտրել է Ցեղասպանության 100-ամյակը, քանի որ Ցեղասպանությունն իր մեջ նաեւ քաղաքական լիցք է կրում, իսկ ժամանակի առումով այն ամենամոտ եւ ամենանշանակալից իրադարձությունն է:
«Ցեղասպանության տարելիցը ուղղակի մի տարելից չէ, որի ժամանակ մենք պետք է հիշենք միայն մեր զոհերին եւ կորուստները: 100-ամյակին մենք պետք է համազգային վերածնունդի, գաղութային այս վիճակից դուրս գալու եւ ազատ ու ինքնիշխան կյանքի սկիզբի խնդիր դնենք»,- ասաց Վարուժան Ավետիսյանը:
Նրա խոսքով՝ իշխանափոխության իրենց ծրագիրը մյուս ուժերի ծրագրերից տարբերվում է անցումային կառավարման փուլի առկայությամբ։
«1-ին քայլով նախատեսում ենք հեռացնել ռեժիմին: 2-րդ քայլով սահմանելու ենք անցումային կառավարման կարճաժամկետ փուլ, որի ընթացքում պետք է երկիրը մաքրվի ներքին տականքից, քաղաքական գործակալների թիմը պետք է հեռացվի առհասարակ քաղաքական ասպարեզից, պետք է երկրում իրականացվի գործակալական եւ տնտեսական գաղտնազերծում՝ լյուստրացիա: Բոլոր այն մարդիկ, որոնք կպարզվի, որ գործել են օրենքի եւ ժողովրդի դեմ, պետք է պատասխանատվության ենթարկվեն՝ այլեւս հնարավորություն չունենալով մասնակցել պետության կառավարմանը: Պետք է կազմաքանդվի քրեաօլիգարխիկ տնտեսությունը, ժողովրդից թալանվածը պետք է վերադարձվի, կուսակցությունները պետք է վերագրանցվեն, քանի որ հնարավոր չէ՝ դրանք գոնե վերնախավերի մասով ներառված չլինեն քաղաքական գործակալների շերտի շահերի տիրույթում: Միայն այդպիսի կանխարգելիչ միջոցառումներից հետո հնարավորություն կընձեռվի կազմակերպել արդար ընտրություններ, դրանց միջոցով նոր միայն երկիրը վերադարձնել բնականոն հուն»,- ասաց «Նախախորհրդարանի» մամուլի խոսնակը:
Նշենք, որ ավտոերթը կմեկնարկի հոկտեմբերի 19-ին, որի առաջնորդությունը ստանձնելու է «Սարդարապատ» շարժման նախաձեռնող խմբի համակարգող, «Նախախորհրդարանի» քարտուղարության համակարգող, Շուշիի առանձանկի գումարտակի հրամանատար Ժիրայր Սեֆիլյանը: Առաջին ավտոերթի երթուղին կլինի՝ Երեւան-Արտաշատ-Մասիս-Արմավիր-Վաղարշապատ-Աշտարակ-Աբովյան-Երեւան երթուղով։