Ցավոք, վաճառողները ոչ միշտ են արդար գնորդների հետ: Գնորդին անորակ կամ նույնիսկ ակնհայտորեն փչացած ապրանք վաճառելու դեպքերում գործի են դրվում դեռեւս խորհրդային ժամանակներում փորձված մեթոդներ:
Գնորդների սպասարկման ոլորտում առաջընթացն արտահայտվել է նրանով, որ ավանդական «կոմունիստականին» ավելացել են «կապիտալիստական» մեթոդները: Այդ ցանկը բավական լայն է, այդ պատճառով խոսենք դրանցից մի քանիսի մասին՝ էլեկտրոնիկայի եւ կենցաղային տեխնիկայի գծով:
Էլեկտրոնիկայի մի գիտակ հետաքրքիր փորձ է անցկացրել: Ուշադիր ուսումնասիրելով տպիչների տեսականին՝ միամիտ տեսքով վաճառողին հարցրել է. «Սրանցից ո՞րն է ամենալավը»: Ի պատասխան վաճառողը խորհուրդ է տվել վատագույն տարբերակը: Այսինքն՝ ակնհայտորեն հին սերնդից մնացած տպիչ: Չնայած նույն խանութում փոքր-ինչ ավելի թանկ ժամանակակից մոդելներ են եղել:
Հաճախ փչացած կենցաղային կամ էլեկտրոնային տեխնիկան վերանորոգելուց հետո խնամքով փաթեթավորում են, իսկ տուփի բացված հատվածներն ինքնակպչուն ժապավենով քողարկում: Նման գործողությունից հետո ապրանքը գնորդին առաջարկում են՝ ամբողջովին նորի անվան տակ: Պատահում է, երբ վաճառողը գնորդին խնդրում է սեփական աչքով հավաստիանալ, որ փաթեթավորումն ամբողջական է: Հնարքը նրանում է, որ ավելի վաղ արկղը բացում են ներքեւից, իսկ վերեւի հատվածն անվնաս է մնում:
Այս թվարկումը կարելի է հաջողությամբ շարունակել, բայց բոլոր դեպքերում եզրակացությունը մեկն է. գնորդը պետք է առավելագույնս ուշադիր լինի: Հայաստանի Սպառողների ասոցիացիայի նախագահ Արմեն Պողոսյանը խորհուրդ է տալիս ապրանք գնելիս անպայման դրամարկղային կտրոն պահանջել: Ապրանքային կտրոնը կարող է պետք գալ անորակ ապրանքը վերադարձնելիս:
Եթե տեխնիկապես բարդ կենցաղային սարք եք գնում, ապա պարտադիր դրան պետք է կցված լինի անձնագիրը, ինչպես նաեւ երաշխիքային կտրոնը: Իսկ եթե նշված փաստաթղթերը բացակայում են, ապա միանգամայն հնարավոր է, որ դա «ֆիրմային» ապրանք չէ:
Գնված ապրանքը հետ վերադարձնելը, նույնիսկ՝ օրենքի հիման վրա, հաճախ վերածվում է դժվարին խնդրի: Նման դեպքերում, ըստ Արմեն Պողոսյանի, Սպառողների ասոցիացիան պատրաստ է օգնել գնորդներին: