Վարչապետ Հովիկ Աբրահամյանը Երեւանի մաթեմատիկական մեքենաների գիտահետազոտական ինստիտուտի «Երեւան Էքսպո» ցուցահանդեսային համալիրում ներկա է գտնվել «Հայագրոֆորում» համաժողովի բացմանը:

Հայաստանի Հանրապետության կառավարության եւ անձամբ իր անունից  ողջունելով եւ շնորհավորելով ներկաներին Գյուղատնտեսության աշխատողի օրվա կապակցությամբ՝ Հովիկ Աբրահամյանը նշել է, որ ՀՀ կառավարության ծրագրի հիմնական ուղղություններից է գյուղատնտեսության արդիականացումը, որը ռազմավարական նշանակություն ունի մեր երկրի տնտեսության համընդհանուր զարգացման համատեքստում:  «Պատմության տարբեր ժամանակաշրջաններում գյուղն ու հողն առանցքային դեր են խաղացել մեր ժողովրդի կյանքում եւ շարունակում են նշանակալի դեր խաղալ մեր հասարակության բարեկեցության ապահովման գործում: Որքան էլ ժամանակակից տեխնոլոգիաներն առաջնային նշանակություն ստանան տնտեսության տարբեր ոլորտներում, միեւնույնն է, հողի նկատմամբ սերը, մարդկային ջերմությունն ու հոգատարությունն են, որ ապահովում են ավելի որակյալ ու բնական գյուղատնտեսական արտադրանք»,- ասել է վարչապետը:

Կառավարության ղեկավարի խոսքով՝ այսօր, ավելի քան երբեւէ, Հայաստանում բարենպաստ պայմաններ  են ստեղծված գյուղատնտեսության զարգացման համար: Հովիկ Աբարահամյանն ընդգծել է, որ Եվրասիական տնտեսական միությանը Հայաստանի անդամակցությունը նոր հորիզոններ է բացում գյուղատնտեսական ապրանքների արտահանման ծավալների մեծացման համար: Այս համատեքստում վարչապետն անհրաժեշտ է համարել ազգային գյուղատնտեսական շուկայի ենթակառուցվածքների շուտափույթ արդիականացումը, միջազգային չափորոշիչներին համապատասխան ապրանքատեսակների որակի ապահովումը:

«Ծանոթ լինելով գյուղացու հոգսերին եւ խնդիրներին եւ գիտակցելով մրցունակ գյուղատնտեսության դերը երկրի առաջընթացի գործում՝ ՀՀ կառավարությունը հետեւողական քայլեր է ձեռնարկելու գյուղական վայրերի սոցիալական խնդիրների լուծման եւ գյուղատնտեսական ոլորտի արդիականացման ուղղությամբ:

Վերջին տարիների ընթացքում երկրի ագրոարդյունաբերական համալիրն առաջատար դիրք է զբաղեցնում մեր ազգային տնտեսությունում: Նոր թափ է ստանում գյուղական վայրերի սոցիալական նշանակության ենթակառուցվածքների զարգացման գործընթացը, կառուցվում են կարեւոր օբյեկտներ: Վստահ եմ, որ աստիճանաբար բարելավվելու է նաեւ կյանքի մակարդակը: ՀՀ կառավարության մոտեցումն այն է, որ ագրարային ոլորտում լուրջ ռազմավարական բարեփոխումները պետք է ապահովեն առավել բարենպաստ պայմաններ յուրաքանչյուր տնտեսվարող սուբյեկտի զարգացման համար»,- նշել է Հովիկ Աբրահամյանը: Վարչապետի դիտարկմամբ՝ գյուղատնտեսությունն էական ազդեցություն ունի երկրի ամբողջ տնտեսության զարգացման վրա եւ կառավարությունը շարունակելու է պետական աջակցություն ցուցաբերել ոլորտի զարգացմանը, իսկ ագրարային քաղաքականությունն ուղղված է լինելու աշխատանքային անրաժեշտ պայմանների ապահովմանը: Հովիկ Աբրահամյանը ցուցահանդեսին մասնակից փոքր եւ միջին ձեռնարկատիրության ներկայացուցիչներին վստահեցրել է, որ կառավարությունը նրանց կողքին է ու պատրաստակամ է աջակցելու ՓՄՁ-ների զարգացմանն ուղղված յուրաքանչյուր նախաձեռնության:

Գյուղատնտեսության բնագավառում ներդրած ավանդի եւ գյուղատնտեսության աշխատողի օրվա կապակցությամբ Հովիկ Աբրահամյանը ՀՀ վարչապետի հուշամեդալով է պարգեւատրել եւ շնորհակալագրով խրախուսել ոլորտի մի խումբ ներկայացուցիչների:

 Վարչապետ Աբրահամյանը շրջել է նաեւ «Արմպրոդէքսպո» ցուցահանդեսին մասնակից ագրոպարենային ոլորտը ներկայացնող ընկերությունների տաղավարներով, ծանոթացել նրանց արտադրատեսականուն, գործունեությանը եւ առաջիկա ծրագրերին:

 «Արմպրոդէքսպո-2014»-ին մասնակցում են 67 ընկերություններ, որոնք ներկայացնում են գյուղատնտեսական ապրանքների լայն տեսականի: